АҚШ-тың «ең қауіпті қылмыскерлер» тізімінде Қазақстанның үш азаматы бар

АҚШ Ішкі қауіпсіздік министрлігі жүргізетін «worst of the worst» деп аталатын ең қауіпті қылмыскерлер тізіміне Қазақстанның үш азаматы енгізілді. Бұл деректер министрліктің ашық базасында жарияланған.

АҚШ Ішкі қауіпсіздік министрлігі мәліметінше, аталған тізімге ауыр қылмыс жасаған және қоғамға қауіп төндіреді деп танылған шетел азаматтары енгізіледі.

Тізімге енген қазақстандықтардың бірі Алабама штатында ұсталып, шабуыл жасағаны және ұрланған мүлікті сақтағаны үшін сотталған. Екінші азамат Флорида штатында ұрлық дерегі бойынша қамауға алынған. Ал үшінші қазақстандық Орегон штатында қарулы шабуыл жасады деген күдікпен қамауда отыр.

Айта кетейік, бұл антирейтингте Қазақстан азаматтарымен қатар Украина, Ресей және Беларусь елдерінен шыққан адамдар да бар.

Еске салайық, «worst of the worst» тізімі АҚШ аумағында ауыр қылмыс жасаған, сондай-ақ ұлттық қауіпсіздікке қатер төндіреді деп бағаланған шетелдіктерді қамтиды.