АҚШ-тағы виза саясаты: Қазақстандықтардың құжаттары неге қабылданбайды

Қазақстан азаматтарына американдық визаларды беруден жиі бас тарту саяси немесе өзге де шектеулерге емес, негізінен құжаттарды рәсімдеу кезіндегі техникалық қателіктерге байланысты. Бұл туралы брифингте Сыртқы істер министрлігінің ресми өкілі Ерлан Жетыбаев мәлімдеді.

Ведомствоның ақпараты бойынша, виза беру туралы шешімді шет мемлекет талаптардың қатаң тізімі негізінде қабылдайды. Егер анкета мен ілеспе құжаттар ережелерге толық сәйкес келсе, өтініш берушілер көп жағдайда мақұлдау алады.

«Егер құжаттарда бірдеңе дұрыс болмаса, әдетте азаматқа нақтылайтын сұрақтар қойылады, қосымша құжаттар талап етіледі, оларды ұсынған кезде, менің білуімше, көп жағдайда мақұлдау алады», - деп түсіндірді Жетыбаев.

Журналистердің қазақстандықтарға бас тартудың жиілеп кетуіне шынымен де құжаттардың дұрыс өткізілмеуі басты себеп пе деген сұрағына жауап бере отырып, СІМ ресми өкілі бұл фактіні растады.

Әңгіме азаматтардың визалық досьені дайындау кезеңінде жіберетін дәлсіздіктері туралы болып отыр. Әрбір нақты мемлекетте өзіндік регламенттер қолданылады, тіпті олардан сәл ғана ауытқу консулдықтың теріс жауап беруіне алып келеді.

«Техникалық мәселелер. Қандай да бір елде ұсынылатын құжаттарға қойылатын талаптар мен сәйкестік. Кейбір елдерде тізім үлкен, кейбірінде сәл аздау. Тіпті құжаттардың шағын тізімі болған күннің өзінде, құжаттардың дұрыс ұсынылмау жағдайлары болады - анкетаны толтыру кезінде, сақтандыру, билеттер. Әртүрлі жағдайлар туындайды. Яғни, әр жағдай жеке қарастырылады», - деп атап өтті өкіл.

Брифинг барысында Жетыбаевқа Ресей азаматтары АҚШ визасын Қазақстаннан келген өтініш берушілерге қарағанда жиірек және жоғары пайыздық қатынаста мақұлдау алады деген ақпаратқа қатысты да сұрақ қойылды.

Дипломатиялық ведомствоның ресми өкілі американдық дипломаттар тарапынан ресми растаулардың жоқтығын алға тартып, бұл ақпаратты растамады.

«Сұрағыңыздың ресейліктерге қатысты екінші бөлігіне келсек, олар мүмкін жоғарырақ пайыз алады дегенге, ондай ақпарат жоқ, менің білуімше, АҚШ елшілігі тарапынан ресми мәлімдемелер мен статистикалық жарияланымдар ұсынылмайды», - деп қорытындылады ол.

Соңында СІМ қазақстандықтарға визалық анкеталарды толтыруға мұқият қарауды ұсынды.