АҚШ-тағы елшілік заңсыз жүрген қазақстандықтарды ерікті түрде елге оралуға шақырды

АҚШ-тағы Қазақстан елшілігі иммиграциялық заңнаманы бұзып, елде заңсыз жүрген азаматтарға елге ерікті түрде оралуға шақырды. Бұл туралы мекеме ресми мәлімдеме таратты.

«АҚШ Ішкі қауіпсіздік министрлігі (DHS) елде заңсыз жүрген шетел азаматтарына өз еркімен елден шығуға мүмкіндік беретін жаңа бағдарламаны іске қосты. Бағдарлама аясында отанына өз еркімен қайтуды таңдаған азаматтарға қайтар билет құны төленіп, елге келгеннен кейін 1000 АҚШ доллары мөлшерінде бір реттік қаржылай көмек беріледі», – делінген хабарламада.

Бағдарламаға қатысу үшін CBP Home атты мобильді қосымша арқылы өтініш беру қажет.

АҚШ Ішкі қауіпсіздік министрі Кристи Ноэм бұл бастаманы заңсыз мигранттардың қамауға алынбауы және басқа да салдарлардан сақтануы үшін ең қауіпсіз, жүйелі әрі үнемді жол деп сипаттады.

Елшілік заңды иммиграциялық мәртебесі жоқ азаматтарға бұл бағдарламаны мұқият қарастыруды ұсынады.

«Бұл – қазіргі жағдайды заңды жолмен шешуге және болашақта АҚШ-қа кіру құқығын сақтау үшін маңызды мүмкіндік болуы мүмкін», – делінген дипломатиялық өкілдік мәлімдемесінде.