АҚШ-та Трамптың жақтасы Чарли Киркті атып өлтірді

АҚШ-та белгілі саяси белсенді, подкаст жүргізуші және Дональд Трамптың жақтасы Чарли Киркке оқ атылды. Оқиға Юта штатындағы Utah Valley университетінің кампусында оның сөз сөйлеуі кезінде болған (Оқиға видеосы). Кирк мойнынан жараланып, ауыр халде ауруханаға жеткізілді. Біраз уақыттан кейін АҚШ президенті Дональд Трамп оның қайтыс болғанын хабарлады.

Трамп өзінің Truth Social желісіндегі парақшасында Киркті ұлықтап, елде төрт күндік аза тұту жариялады. Мемлекеттік тулар жексенбі кешіне дейін түсіріледі.

"Ұлы әрі аңызға айналған Чарли Кирк енді арамызда жоқ. АҚШ-та жастарды ешкім ол сияқты түсінген де, қолдаған да емес. Бәрі оны жақсы көрді әрі құрметтеді, әсіресе мен. Мелания екеуіміз жары Эрикаға және оның отбасына көңіл айтамыз. Чарли, біз сені сүйеміз", – деп жазды Трамп.

31 жастағы Чарли Кирк Turning Point USA атты студенттік ұйымның негізін қалаған. Ұйымның мақсаты – мектептер мен университеттерде консервативтік құндылықтарды насихаттау.

Алдын ала мәліметке сәйкес, Киркке 100–200 метр қашықтықтан оқ атылған. Алғашында билік күдікті ұсталғанын хабарлағанымен, кейін шабуыл жасаған адамның әлі де бостандықта екені белгілі болды.