АҚШ пен Иран уақытша бітімге келді

АҚШ Иранға қарсы бомбалау және өзге де әскери соққыларды екі аптаға тоқтату туралы шешім қабылдады. Бұл туралы АҚШ президенті Дональд Трамп Truth Social әлеуметтік желісінде мәлімдеді.

Оның айтуынша, шешім Пәкістанмен жүргізілген консультациялардан кейін қабылданған. Шарттардың бірі – осы кезеңде Ормуз бұғазы арқылы кемелердің еркін өтуін қамтамасыз ету.

Трамп АҚШ негізгі әскери міндеттерін орындап қана қоймай, жоспардан да асыра орындағанын айтты. Сонымен қатар Вашингтон Тегеранмен ұзақ мерзімді бейбіт келісім мүмкіндігін талқылап жатқанын жеткізді. АҚШ тарапының мәліметінше, Иран 10 тармақтан тұратын жоспар ұсынған.

Америкалық шенеунік The New York Times басылымына соққылардың тоқтатылғанын растады. Ал CNN дерегінше, Израиль де екі апталық үзіліске келіскен.

Иран тарапы да уақытша бітімге дайын екенін мәлімдеді. Fars агенттігінің хабарлауынша, Тегеран жағдайды «жеңіс» деп бағалап, санкцияларды алып тастау және Ормуз бұғазы арқылы өтетін кемелер үшін төлем енгізу талаптарын қамтитын өз жоспарын ұсынған.

Осы ретте Ақорда АҚШ пен Иран арасындағы бітім туралы шешімді Мемлекет басшысы Қасым-Жомарт Тоқаев қолдағанын хабарлады.