АҚШ пен Иран келіссөзінен кейін мұнай арзандап алтын қымбаттай бастады

25 наурыз күні әлемдік нарықта алтын бағасы айтарлықтай өсім көрсетті. Бұған Таяу Шығыстағы қақтығысты реттеу туралы Ақ үйдің мәлімдемесі мен мұнай бағасының төмендеуі себеп болды. CNBC хабарлауынша, споттық алтын бағасы 2,56%-ға өсіп, бір унция үшін $4 588-ді құрады.

Нарықтағы бұл өзгеріске АҚШ Президенті Дональд Трамптың сейсенбі күнгі мәлімдемесі тікелей әсер етті. Трамп Иранның энергетикалық нысандарына соққы беру жоспарынан бас тартқанын, өйткені Тегеранмен келіссөздер жүріп жатқанын жеткізді. «Олар бізбен сөйлесіп жатыр және ақылға қонымды дүниелер айтуда», - деді АҚШ басшысы.

Бұл жаңалықтан кейін мұнай бағасы күрт төмендеді: Brent маркалы мұнай 6%-ға арзандап, барреліне $98,31 болса, WTI мұнайы $87,65-ке дейін түсті. Мұнайдың арзандауы инфляциялық қауіптерді бәсеңдетіп, инвесторлардың алтынға деген сұранысын арттырды.

Goldman Sachs сарапшылары алтын бағасының қазіргі құбылмалылығын қалыпты жағдай деп санайды. Банктің шикізат нарығын зерттеу бөлімінің тең төрағасы Даан Стрейвеннің айтуынша, пайыздық мөлшерлемелердің өсуі мен нарықтағы стресс бағаға қысым жасағанымен, алтынның болашағы бәрібір сенімді. Goldman Sachs жыл соңына қарай алтын бағасы $5 400-ге дейін көтеріледі деп болжап отыр. Бұған орталық банктердің геосаяси тәуекелдерді азайту үшін алтын қорын белсенді түрде толықтыруы негіз болмақ.