АҚШ Конгресі: Билл Гейтс Эпштейн ісіне қатысты куәлік етті

Microsoft компаниясының негізін қалаушы, кәсіпкер Билл Гейтс АҚШ Конгресінің Өкілдер палатасы жанындағы Бақылау комитетінде Джеффри Эпштейнмен болған бұрынғы қарым-қатынастарына қатысты куәлік етті.

Тыңдау барысында Билл Гейтс Джеффри Эпштейннің қылмыстық әрекеттері туралы хабарсыз болғанын мәлімдеді. Кәсіпкердің айтуынша, 2011 жылы басталған таныстық тек денсаулық сақтау саласындағы қайырымдылық жобаларына қаржы тарту мақсатын көздеген.

«Мен Эпштейннің өткеніндегі кейбір құқықтық мәселелерден хабардар болдым, алайда оның жасаған қылмыстарының ауқымын толық түсінбедім. Онымен байланыс орнату кезінде тиісті тексеру жүргізбегенім – үлкен қателік болды», – деп мойындады Гейтс конгрессмендер алдында.

Сонымен қатар, кәсіпкер Эпштейннің оның жеке өміріне қатысты құпия мәліметтерді, оның ішінде некедегі опасыздық фактілерін иемденгенін атап өтті. Гейтстің сөзінше, бұл ақпарат оның отбасына моральдық тұрғыдан ауыр тиген, бірақ Эпштейнмен арадағы қарым-қатынасқа еш қатысы болмаған. Ол өзінің Эпштейннің жеке иелігіндегі аралдарға немесе басқа да жылжымайтын мүліктеріне барғанын ресми түрде жоққа шығарды.

Билл Гейтс Эпштейнмен байланысының «шектеулі» болғанын және 2014 жылдың желтоқсанында толықтай тоқтатылғанын баса айтты.

Айта кетейік, АҚШ Әділет министрлігі жариялаған сот материалдарына сәйкес, Гейтс Эпштейнмен байланыста болған көптеген ықпалды тұлғалардың қатарында аталған болатын. Бұған дейін аталған іс бойынша АҚШ-тың экс-президенті Билл Клинтон мен бұрынғы мемлекеттік хатшы Хиллари Клинтон да конгресс алдында түсінік берген еді.