АҚШ қазақстандықтарға иммиграциялық виза беруді тоқтатты: нені білу керек?

АҚШ билігі 21 қаңтардан бастап бірқатар елдің азаматтарына, соның ішінде қазақстандықтарға иммиграциялық виза беруді уақытша тоқтататынын мәлімдеді. Бұл туралы АҚШ-тың Мемлекеттік департаменті 14 қаңтарда хабарлады, деп жазады Reuters.

Аталған шешім Дональд Трамп әкімшілігінің бастамасымен қабылданған. Тізімге Қазақстанмен қатар Қырғызстан, Армения, Әзербайжан, Молдова, Беларусь, Грузия, Иран, Ресей, Пәкістан, Өзбекстан және өзге де елдер кірген. Жалпы саны – 75 мемлекет.

Қандай визаларға қатысты?

Бұл шектеу туристік, студенттік немесе қысқа мерзімді визаларға әсер етпейді. Сондай-ақ спорттық іс-шараларға, соның ішінде футболдан әлем чемпионатына берілетін визалар бұрынғы тәртіппен рәсімделе береді. Шешім тек АҚШ-та тұрақты тұруға мүмкіндік беретін иммиграциялық визаларға қатысты.

Әдетте АҚШ-қа түбегейлі қоныс аударғысы келетіндер алдымен иммиграциялық виза алып, кейін грин-карта рәсімдейді.

Шешімнің себебі неде?

АҚШ Мемлекеттік департаментінің түсіндіруінше, бұл қадам шетелден көшіп келетін азаматтардың әлеуметтік және мемлекеттік жәрдемақыларды теріс пайдалануына жол бермеу мақсатында жасалған.

Ведомствоның баспасөз хатшысының орынбасары Томми Пиготттың айтуынша, АҚШ иммиграцияға жарамсыз деп танылған адамдарды елге кіргізбеу құқығын пайдаланады. Себебі мұндай тұлғалар мемлекетке салмақ салып, қоғам ресурстарын шамадан тыс пайдалануы мүмкін.

Қашан қайта ашылады?

Вашингтон иммиграциялық визаларды қарау тәртібін қайта қарап жатқанын мәлімдеді. Алайда бұл санаттағы визаларды беру қашан қайта қалпына келетіні нақты айтылған жоқ. Ресми дерек бойынша, шектеу уақытша сипатта.

Осылайша, қазақстандықтар үшін АҚШ-қа көшуге қатысты рәсімдер әзірге тоқтатылып отыр, ал қысқа мерзімді сапарларға берілетін визалар бұрынғыдай қолжетімді болып қала береді.