АҚШ Иранмен бизнес жүргізетін елдерге салық салмақ: ҚР Сауда министрлігі мәлімдеме жасады

Қазақстан АҚШ-тың Иранмен іскерлік байланысы бар елдерге баж салығын енгізу туралы мәлімдемесінен кейін жағдайдың ықтимал даму сценарийлерін қарастырып жатыр. Бұл туралы Қазақстан Республикасы Сауда және интеграция министрлігі хабарлады.

АҚШ президенті Дональд Трамп 12 қаңтар күні Truth Social әлеуметтік желісінде Иранмен бизнес жүргізетін кез келген мемлекетке қатысты қатаң шара қолданылатынын мәлімдеген. Оның айтуынша, мұндай елдер АҚШ-пен жасалатын барлық іскерлік операциялар бойынша 25 пайыз көлемінде баж салығын төлеуге міндеттеледі. Трамп бұл шешімнің түпкілікті әрі міндетті екенін атап өткен.

Осыған байланысты Қазақстанның Сауда және интеграция министрлігі халықаралық сауда-экономикалық күн тәртібін жіті бақылап отырғанын мәлімдеді. Ведомство өкілдерінің айтуынша, енгізілуі мүмкін шаралардың нақты тетіктері мен қолданылу параметрлері әзірге белгісіз.

«Қазіргі таңда мүмкін болатын шешімдер мен олардың салдарын бағалау жүргізілуде. Қазақстан өз кезегінде халықаралық сауда-экономикалық міндеттемелерін дәйекті түрде орындап келеді және сыртқы экономикалық саясатта теңгерімді әрі прагматикалық ұстанымды сақтайды», – делінген министрлік таратқан хабарламада.

Айта кетейік, Қазақстан Иранға арпа, астық, күнжара және өзге де қатты қалдықтар, қой еті мен жүгері экспорттайды. Ал Ираннан Қазақстанға жеміс-жидек, құрма, інжір, авокадо, ананас, жаңғақ, минералды су мен көкөніс жеткізіледі.

2025 жылғы ақпанда екі ел арасында өткен бизнес-форум аясында жалпы құны 92,8 миллион долларды құрайтын 10 коммерциялық құжатқа қол қойылған болатын.