АҚШ енгізген баж салығы қазақстандық экспорттың 5%-ына ғана әсер етеді – Сауда министрлігі

АҚШ тарапы қазақстандық тауарларға 27% көлемінде кедендік баж салығын енгізгеннен кейін, ҚР Сауда және интеграция министрлігі ресми мәлімдеме жасады.

Министрліктің хабарлауынша, жүргізілген алдын ала талдау АҚШ қабылдаған жаңа шаралардың Қазақстаннан экспортталатын өнімдердің басым бөлігіне әсер етпейтінін көрсеткен. Өйткені бұл тауарлар АҚШ әкімшілігінің нормативтік актілерінде қарастырылған ерекшелік тізіміне енген.

Қазақстаннан АҚШ-қа экспортталатын өнімдердің 92%-ын шикі мұнай, уран, күміс және ферроқорытпалар құрайды. Бұл тауарлар АҚШ Президенті қол қойған жарлықтағы ерекше тізімге енгізілген.

Ал жаңа кедендік баж салықтары 2024 жылы экспорты 95,2 млн долларды құраған тауарларға қатысты қолданылады. Атап айтқанда:

• фосфор – 15,9 млн доллар,

• ферросилиций – 12,7 млн доллар,

• линзалар – 4,1 млн доллар,

• бидай желімі – 4 млн доллар,

• аммоний нитраты – 2,4 млн доллар.

Бұлар жалпы экспорттың небәрі 4,8%-ын құрайды.

Министрлік сондай-ақ Қазақстан Үкіметі қосымша тарифтерді қолданбау мәселесін талқылау үшін АҚШ тарапымен консультациялар бастайтынын мәлімдеді.

Ұлттық статистика бюросының деректеріне сәйкес, 2024 жылы Қазақстан мен АҚШ арасындағы тауар айналымы 4,2 млрд долларды құрап, 2023 жылмен салыстырғанда 4%-ға өскен. Қазақстаннан АҚШ-қа экспорт 30,6%-ға артып, 2 млрд доллар болды, ал АҚШ-тан импорт көлемі 2,2 млрд долларды құрады.