АҚШ билігі Қазақстан аспанында байқалған белгісіз нысан туралы құжаттардың құпиясын ашты

АҚШ-тың Қорғаныс министрлігі (Пентагон) белгісіз ұшатын нысанға (UAP) қатысты ондаған құпия файлды жариялады, олардың ішінде Қазақстан аумағында болған оқиға да айтылады. Құжаттар Дональд Трамптың мемлекеттік органдардың жұмысында ашықтықты қамтамасыз ету туралы жарлығына сәйкес жарияланды, деп хабарлады Пентагонның баспасөз қызметі.

Архивтік мәліметтерге сәйкес, 1994 жылдың 27 қаңтарында Қазақстан аспанында Boeing 747 ұшағымен 41 мың фут биіктікте ұшып бара жатқан тәжік ұшқышы мен АҚШ-тың үш азаматы белгісіз нысанды көрген. Экипаждың сипаттауы бойынша, оққа ұқсайтын нысан аспанда өте жоғары жылдамдықпен қозғалып, 90 градусқа бұрылу, штопор тәрізді маневрлер мен шеңбер бойымен айналу сияқты күрделі әрекеттер жасаған.

Пентагон өкілдері бұл материалдардың 1960 жылдан 2025 жылға дейінгі кезеңді қамтитынын мәлімдеді. Ведомствоның хабарлауынша, бұған дейінгі әкімшіліктер мұндай ақпаратты жоққа шығаруға тырысса, қазіргі басшылық қоғам үшін барынша қолжетімді етуді көздеп отыр. 1994 жылғы оқиға кезінде экипаж бақылаған нысанның нақты не екені әлі күнге дейін анықталған жоқ.