Ақмола облысында ауызсу мәселесі Мәжіліс бақылауында

Егіндікөл ауданының тұрғындары Мәжіліс депутаты, «AMANAT» партиясы фракциясының мүшесі Юлия Кучинскаяға ауыз су тапшылығы, жолдардың нашарлығы және кей көшелердің су астында қалуы жөнінде шағымдарын жеткізді.

Депутат халықпен кездесуден соң облыстағы орталық және жергілікті атқарушы органдардың қатысуымен арнайы кеңес өткізіп, Нұра топтық су құбыры жобасының жүзеге асырылуына бақылауды күшейтуге уәде берді.

– Сапалы ауызсуға қол жеткізу – әрбір азаматтың заңды құқығы. Бұл мәселе ұзақ жылдар бойы қордаланып келгенімен, қазір жүйелі жұмыс жүргізілуде. Басты міндетіміз – әр ауылды, әр үйді таза ауызсумен қамтамасыз ету, – деді Юлия Кучинская.

Нұра топтық су құбырының жағдайына ерекше назар аударылды. 2023 жылы басталған қайта жаңғырту жұмыстарының маңызды кезеңі 2024 жылдың шілдесінде аяқталып, Сабынды ауылынан Егіндікөлге дейінгі 68,5 шақырымдық бөлік қалпына келтірілді. Бұл аудан тұрғындарының басым бөлігін сумен қамтуға мүмкіндік берді.

Биыл құбырларды, сорғыларды, ысырмаларды ауыстыруға және су есептегіш құралдарын орнатуға қаражат бөлінді. Егіндікөл мен Полтавка ауылдарындағы су мұнаралары жөнделеді, ал Абай, Жұлдыз және Жалманқұлақ ауылдарында су тазарту блок-модульдері орнатылады.

2025 жылы облыста кемінде 80 ауыл ауызсумен қамтылмақ. Жалпы 148 ауыл тұрғындарына таза су жеткізіледі деп жоспарланған. Қазіргі таңда Ақмола облысында орталықтандырылған сумен қамту көрсеткіші қалаларда – 99%, ауылдарда – 96,6%-ға жетті.

Айта кетейік, жуырда қабылданған Су кодексі су ресурстарын тиімді пайдалануға, сумен қамту сапасын арттыруға және жауапты тұлғалардың міндетін күшейтуге бағытталған.