Ақмола облысында ауылды су басқаны үшін әкім бас бостандығын шектеу жазасына кесілді

Атбасар аудандық соты Сергеев ауылдық округінің әкімі Қайрат Қожахметовті қызметіне салғырт қарады деп танып, 1 жыл 6 ай мерзімге бас бостандығын шектеу жазасын тағайындады. Бұл туралы соттың баспасөз қызметі хабарлады.

Сот дерегінше, Қожахметов Есіл бассейндік инспекциясы мен төтенше жағдайлардың алдын алу және жою жөніндегі комиссияның гидротехникалық нысанды транзиттік режимге көшіру туралы нұсқауын орындамаған. Соның салдарынан су деңгейі көтеріліп, бөгет жарылып, Самарка ауылындағы 19 үйді су басқан. Залал көлемі – 8 миллион теңге.

Сот жаза тағайындау кезінде айыпталушының кішкентай балалары бар екенін және қылмыстың алғаш рет, абайсызда жасалғанын ескерген.

«Сот үкімімен Қожахметовке 1 жыл 6 ай мерзімге бас бостандығын шектеу жазасы тағайындалды. Ол пробациялық бақылауға алынып, мемлекеттік қызметте лауазым атқару құқығынан айырылды», – делінген мәліметте.

Үкім әлі заңды күшіне енген жоқ.

Өз кезегінде Қайрат Қожахметов бұл шешімді әділетсіз деп атап өтті. Ол жауапкершіліктен қашпайтынын, бірақ өзіне тағылған айыппен келіспейтінін жеткізді.

«Бейбіт күнде бірге күрестік. Бірақ енді кінәлі мен болып қалдым. Мен өз жұмысым үшін жауап беремін. Алайда бұл – жүйені жақсартудың орнына кінәліні іздеу болды», – деді ол.