Әкімшілік құқық бұзған аналар қамалмайды, ал әкелер ше: Конституциялық сот даулы заңды қарады

Қазақстанның Конституциялық соты әкімшілік қамау тағайындау кезінде әкелерге қатысты кемсітушілік бар деген азаматтың шағымын қарастырды.  

Қолданыстағы заңнамаға сәйкес, 14 жасқа дейінгі баласы бар әйелдерге әкімшілік қамау қолданылмайды. Ал ер адамдарға мұндай жеңілдік тек баланы жалғыз өзі тәрбиелеген жағдайда ғана беріледі. Өтініш иесі бұл норма азаматтардың заң алдындағы теңдігі қағидатына қайшы келеді деп есептеген. Алайда Конституциялық сот заң бұзушылық анықтамады. Сот шешімінде аталған норманың басты мақсаты – баланың мүддесін қорғау және жалғыз асыраушысы қамауға алынған жағдайда кәмелетке толмаған баланың қараусыз қалуына жол бермеу екені атап өтілді. 

Сонымен қатар сот заңдағы тұжырымдардың нақты еместігімен келісті. Осыған байланысты Үкіметке аталған нормаларды қайта қарап, жетілдіру жөнінде ұсыныс берілді, ал Жоғарғы сотқа сот практикасын жинақтап, қосымша түсіндірулер әзірлеу тапсырылды.