Air Astana-ның бұрынғы топ-менеджері шулы мәлімдеме жасады: Бас прокуратура тексерісті бастады

Air Astana және FlyArystan әуе компанияларының бұрынғы топ-менеджері Ренат Әбілхановтың атынан тараған резонанстық хаттан кейін Бас көлік прокуратурасы арнайы тексеріс бастады, деп Tengri Travel хабарлады.

Қазіргі уақытта Әбілханов қаржы жымқыру және ақшаны заңдастыру күдігімен бір жылдан астам уақыт бойы тергеу изоляторында отыр. Алайда ол өз хатында кінәсіз екенін айтып, айыптаулардың қолдан жасалғанын және әуе компаниясы басшылығы тарапынан корпоративтік қысым көрсетілгенін мәлімдеді.

Әбілхановтың айтуынша, бұл қылмыстық іс компанияның IPO-ға дайындығы кезінде басталған. Ол 2023 жылы басшылық тарапынан коммерциялық көрсеткіштерді қолдан асырып көрсету туралы талап қойылғанын, бірақ «реалистік емес сандарды салудан» бас тартқаннан кейін қудалауға ұшырағанын алға тартады. Сонымен қатар ол әуе компаниясы ішінде топ-менеджерлер мен олардың туыстарына жеңілдікпен билеттер беру жүйелі түрде жүргізілгенін және бұл әрекеттердің жоғары жақтың нұсқауымен орындалғанын айтады. Тіпті, арзан тарифтердің белгілі бір уақытта нақты адамдар үшін ашылуы және овербукингтің әдейі қолданылуы мүмкін екендігі туралы жазылған хаттар мен скриншоттар да жарияланды.

Бас көлік прокуратурасы хатта жазылған барлық уәжді, соның ішінде жеңілдікпен билеттерді заңсыз үлестіру деректерін тексеру үшін Азаматтық авиация комитетіне тиісті талап жолдады. Тергеу органдары Әбілханов үшін мүлкін тәркілей отырып, 9 жылға бас бостандығынан айыру жазасын сұрап отыр. Өз кезегінде FlyArystan әуе компаниясы сот үкімі шыққанға дейін бұл жағдайға қатысты ресми түсініктеме бере алмайтындарын мәлімдеді. Естеріңізге сала кетейік, 2024 жылы әуе компаниясының басшылығы қаржы жымқыру деректерін анықтап, тәуелсіз аудиторлық тексерістен кейін құқық қорғау органдарына арызданған болатын.