АИ-95 пен АИ-98 сапасына қатысты дау: Павлодар зауыты тексеру нәтижесін жариялады

Павлодар мұнай-химия зауыты АИ-95 және АИ-98 бензиндерінің зауыттан жөнелтілген партиялары белгіленген сапа талаптарына сай екенін мәлімдеді. Автомобиль бензинінің сақталған сынамалары 25 тамызда SGS Kazakhstan тәуелсіз зертханасында тексерілген.

Зауыт мәліметінше, зертхана сынамалардың МЕМСТ 32513 талаптарына сәйкестігін растаған. Кәсіпорын осы қорытындыға сүйеніп, АИ-95 және АИ-98 бензиндерінің жөнелтілген партиялары Кеден одағының техникалық регламенті мен МЕМСТ 32513-2013 талаптарына сай екенін хабарлады.

Тексеруге әр партиядан алдын ала алынып, пломбаланып сақталатын арбитраждық сынамалар алынған. Мұндай сынамалар арнайы қоймада 45 тәулік сақталып, мұнай өнімінің сапасына қатысты дау туған жағдайда қайта тексеруге пайдаланылады.

Бұған дейін Энергетика министрі Ерлан Ақкенженов АИ-95 және АИ-98 бензинінің сапасына қатысты азаматтардан шағым түскенін айтқан еді. Оның сөзінше, жанармай құю бекеттері мәселені мұнай өңдеу зауытынан көрсе, зауыттар керісінше жанармай бекеттеріне сілтеген. Осыған байланысты министрлік өкілдері Павлодар мұнай-химия зауытына тексеру жүргізуге барған.

Сол кезде Ақкенженов жанармай өндіру кезінде ақау болуы мүмкін екенін де жоққа шығармаған еді. Енді зауыт жариялаған тәуелсіз зертхана қорытындысы зауыттан жөнелтілген бензин сынамаларының сапасы талапқа сай болғанын көрсетіп отыр. Алайда берілген мәлімдемеде жанармай құю бекеттеріндегі бензинге жүргізілген тексеру нәтижесі туралы ақпарат жоқ.