«Аға, мен ата-анамнан айырылып қалдым»: Айтыскер Салтанат Өтелбаева жұбайымен бірге жол апатынан қаза тапты

Белгілі айтыскер, тарих ғылымдарының магистрі, Ыбырай Алтынсарин мемориалдық музейі директорының орынбасары Салтанат Амантайқызы Өтелбаева жұбайы Мырзабек Қасымовпен бірге жол апатына түсті. Қайғылы оқиға Атбасар мен Есіл тасжолында орын алды.

Қолда бар мәліметке сәйкес, ерлі-зайыптылар Астанадан таңғы сағат 04:00 шамасында шығып, Қостанайға бағыт алған. Олар қыздарының мектеп бітіру және аттестат табыстау рәсіміне үлгеру үшін жолға шыққан. Алайда көздеген жеріне жете алмады.

Қайғылы жағдай туралы алғашқылардың бірі болып оның әріптесі әрі досы Марғұлан Оспанов хабарлап, әлеуметтік желіде көңіл айту жазбасын жариялаған. Сондай-ақ ол қаза тапқан отбасының ұлы Нұрсұлтаннан таңғы сағат 9:00-де қоңырау түскенін, сол қоңырауды өзі қабылдағанын айтқан. Нұрсұлтан сол сәтте: «Аға, мен ата-анамнан айырылып қалдым» деп жазған.

Оспанов өз жазбасында марқұмдардың туыстары мен жақындарына көңіл айтып, Алладан сабыр беруді сұраған.

Салтанат Өтелбаева кәсіби қызметін тарихи-мәдени мұраны сақтау мен насихаттауға арнаған. Ыбырай Алтынсарин музейі директорының орынбасары ретінде ол көптеген маңызды жобаларды жүзеге асырып, көрмелер мен ғылыми-зерттеу жұмыстарын ұйымдастырған. Әріптестері оны жоғары білікті маман, ашық мінезді, жүрегі кең, азаматтық ұстанымы берік тұлға ретінде сипаттайды. Сонымен қатар Салтанат Өтелбаева талантты айтыскер ақын ретінде де елге танылған болатын.

Марқұмның артында екі перзенті — Нұрсұлтан мен Алтынай қалды.