АЭС салу бойынша референдум биыл күзде өтеді – Тоқаев

Бұл туралы Президент Қасым-Жомарт Тоқаев БАҚ қызметкерлерін марапаттау рәсімінде мәлімдеді.

"Өздеріңіз жақсы білесіздер, экономиканы дамыту үшін тұрақты энергия көзі керек. Сондықтан мен атом электр стансасын салу мәселесін пысықтау туралы нақты тапсырма бердім. Қазір жан-жақты талқылау болып жатыр. Әртүрлі пікір айтылуда. Бұл үдеріске бұқаралық ақпарат құралдары да белсене атсалысуы керек", – деді ол.

Президент елімізде атом энергетикасын дамытуға зор мүмкіндік бар деп санайды. Сондай-ақ оны дұрыс, яғни тиімді пайдаланған жөн екенін айтып өтті.

"Осы мәселеге қатысты соңғы шешімді халық қабылдайды. Референдум биыл күзде өтеді. Үкімет нақты датаны айқындайды", – деп мәлімдеді Мемлекет басшысы.

Тоқаев өткен жылдың 1 қыркүйегінде халыққа жолдауында референдумның өтетін күнін Энергетика министрлігі белгілеу керектігін айтқан болатын. Одан кейінгі айларда министрлік аймақтарда халықпен ресми кездесулер өткізді.

Биыл маусымда Энергетика вице-министрі Сүннат Есімханов Энергетика министрлігі халықты АЭС құрылысы туралы ақпараттандыру бойынша жоспарлы жұмыстарды күзге дейін аяқтауды жоспарлап отырғанын хабарлады. Оның айтуынша, бұл үшін Қазақстанның тағы 10 облысында кездесулер өткізу қажет.