Адвокат Перизат Қайратты не үшін ақтау керек екенін айтты

Перизат Қайрат пен оның анасы Ғайни Алашбаеваның ісі бойынша апелляциялық шағым түсірілді. Бұл ақпаратты Informburo.kz сайтына олардың қорғаушысы Асланбек Дәулетияров растады.

"Апелляциялық шағымда үкімді жоюды және (Қайрат пен Алашбаеваны – ред.) ақтауды сұрадым. Өйткені олардың іс-әрекетінде қылмыс құрамы жоқ", – деді адвокат.

Бұған дейін Перизат Қайрат 10 жылға бас бостандығынан айырылып, «Шапағат» медалінен (қайырымдылық пен мейірімділік үшін берілетін мемлекеттік награда) айырылған еді.

Сондай-ақ сот үкімі бойынша, Перизат Қайрат пен оның анасы 50 жәбірленушінің пайдасына жалпы сомасы 1 млрд 582 млн теңге материалдық шығынды өтеуі тиіс. Бұдан бөлек, әрқайсысы 22 млн теңге мемлекеттік баж салығын және 698 мың теңгеден сот шығындарын төлеуге міндеттелген.