«Әділет» партиясының филиалдары елдің барлық өңірлерінде құрылады

«Әділет» партиясының II Сьезінде қабылданған басты шешімдердің бірі — еліміздің барлық өңірлерінде партияның аймақтық филиалдарын құру және есептік тіркеуден өткізу, сондай-ақ «Әділет» партиясының филиалы туралы Ережені бекіту болды.

Съезд делегаттары Қазақстанның барлық облыстары мен республикалық маңызы бар қалаларын қамтитын толыққанды өңірлік желіні құруды бірауыздан қолдады. Бұл қадам партияның ұйымдастырушылық тұрғыдан дамуының жаңа кезеңін ашады және оның жергілікті жерлерде тұрақты жұмыс істеуін қамтамасыз етуге мүмкіндік береді.

Партияның Саяси кеңесі Бюросының мүшесі әрі съезд хатшысы Гүлзира Атабаева филиал туралы Ереженің жобасын таныстыра отырып, бұл құжаттың қабылдануы партияның ұйымдастырушылық негізін қалыптастыруды аяқтайтынын және аймақтық құрылымдар жұмысының бірыңғай қағидаттарын айқындайтынын атап өтті. Оның айтуынша, филиалдар аумақтық принцип бойынша құрылып, бірыңғай партиялық жүйенің бөлігі ретінде әрекет ететін болады.

«Филиал туралы Ереже — бұл біздің партияның өңірлерде қалай жұмыс істейтінін, оның аумақтық құрылымдары қалай құрылатынын, жергілікті жерлерде шешімдер қалай қабылданатынын және тәртіп, бақылау мен жауапкершілік қалай қамтамасыз етілетінін анықтайтын негізгі құжаттардың бірі», — деді Гүлзира Атабаева.

Партияның Саяси кеңесінің мүшесі Бөріхан Нұрмұхамедов мемлекеттік тіркеу кезеңі аяқталғаннан кейін партияның іс жүзіндегі ұйымдастырушылық құрылысқа көшетінін мәлімдеді.

«Партияның тағдыры өңірлерде шешіледі — біздің жұмысымыздың негізгі майданы дәл сонда. Азаматтардың сенімі де сонда қалыптасады. Ондағы халық партияның жұмысын күнделікті нақты істері, бастамалары мен нәтижелері бойынша бағалайды», — деп атап өтті Бөріхан Нұрмұхамедов.

Ереженің жеке бір бөлімі ашықтық, есептілік және ішкі бақылау мәселелеріне арналған. Құжатқа сәйкес, аймақтық бөлімшелер қабылданатын шешімдердің ашықтығы, сондай-ақ партия мүшелері мен қоғам алдындағы жауапкершілік қағидаттары негізінде жұмыс істейді.

Дауыс беру қорытындысы бойынша делегаттар «Әділет» партиясының филиалдарын құру және есептік тіркеу туралы шешімді бірауыздан қолдап, партия филиалы туралы Ережені бекітті.