«Адамзаттың масқарасысыңдар»: Еділ Жаңбыршиннің ЛГБТ өкілдеріне қарата айтқан пікірі сотта қаралды

Астана қаласының соты Мәжіліс депутаты Еділ Жанбыршинге қарсы берілген азаматтық талап-арызды қанағаттандырмады. Бұл туралы сот материалдарында айтылды.

Істі қазақстандық Виталий Шевченко қозғаған. Ол өткен жылы депутаттың әлеуметтік желідегі жазбасына пікір қалдырып, оның ұстанымын сынаған. Жауап ретінде Жанбыршин Facebook-та жазған пікірінде өз көзқарасын білдірген.

«Үйіңде не істесең де өзің біл, бірақ ЛГБТ-ны насихаттама. Тыныш өмір сүр, бұл туралы «бақырып-шақырудың» қажеті жоқ! Сендер адамзаттың масқарасысыңдар», – деп пікір қалдырған депутат.

Сот сараптамасының қорытындысына сәйкес, депутаттың жазбасында талап қоюшының ар-намысы мен қадір-қасиетіне нұқсан келтіретін мәліметтер анықталмаған. Мамандар пікірдің бағалау сипатындағы субъективті көзқарас екенін көрсеткен.

Осыған байланысты сот талап-арызды қанағаттандырудан бас тартты. Сонымен қатар талап қоюшыдан сараптама жүргізуге кеткен 131 430 теңге өндіріп алу туралы шешім қабылданды.

Судьяның түсіндіруінше, мұндай істерде талапты қанағаттандыру үшін мәліметтер шындыққа сәйкес келмеуі, таралуы және ар-намысқа нұқсан келтіруі қажет. Аталған шарттардың бірі болмаған жағдайда талап қанағаттандырылмайды.