Адам ұрлап, олардың атынан ірі көлемде несие рәсімдеген: төрт банк бірлескен мәлімдеме жасады

Қазақстанның Қаржыгерлер қауымдастығы Ақмола облысы прокуратурасының мәліметіне қатысты елдегі төрт банктің бірлескен мәлімдемесін жариялады. Бұған дейін прокуратура әлеуметтік осал топтағы азаматтарды ұрлап, олардың атына ірі көлемде несие рәсімдеген ұйымдасқан қылмыстық топқа қатысты тергеу аяқталғанын хабарлаған болатын. Тергеу дерегінше, топ құрамында еліміздің әр өңірінен 25 адам болған, олардың арасында банк қызметкерлері де бар.

Алайда банктер бұл ақпаратқа қатысты өз ұстанымын білдірді.

«Бізге прокуратура органдарынан бұрынғы немесе қазіргі қызметкерлеріміздің қылмыстық іске қатысы бар деген ресми хабарламалар түскен жоқ. Қазіргі уақытта банктер прокуратураға ресми сұрау жолдап, істің мән-жайын анықтауды көздеп отыр. Ресми құжаттар ұсынылған жағдайда, клиенттердің құқықтары мен мүдделерін қорғауға қатысты кез келген тергеуге құқық қорғау органдарына толық көлемде көмек көрсетуге дайынбыз», – делінген мәлімдемеде.

Сонымен қатар банктер өздерінің іскерлік беделін жоғары бағалайтынын және қызметін заңға сәйкес, ашық жүргізетінін атап өтті. Олар прокуратураны қоғамға жарияланатын ресми мәлімдемелерде абай болуға шақырды, себебі мұндай ақпараттар қаржы институттарының іскерлік беделіне нұқсан келтіруі мүмкін.