Абай облысының агроөнеркәсіптік әлеуетін тиімді пайдалану мақсатында жүйелі реформалар басталды

Абай облысының агроөнеркәсіптік кешенінде бұрын-соңды болмаған ауқымды өзгерістер басталып кетті. Облыс әкімі Берік Уәлидің төрағалығымен өткен кеңейтілген жиында аймақтың ауыл шаруашылығы саласын түбегейлі өзгертетін құпия жоспарлар мен миллиардтық жобалар ашық айтылды, деп хабарлайды Абай облысы әкімінің баспасөз қызметі. Президенттің тапсырмасымен 2028 жылға қарай өнім көлемін 2 есеге арттыруды көздейтін бұл стратегиялық жоспар бойынша, Абай облысы қазірдің өзінде еліміздегі ең үздік үштіктің қатарына еніп үлгерген. Жиында белгілі болғандай, биыл көктемгі егіс жұмыстарына «Кең дала» бағдарламасы аясында рекордтық көлемде - 14 миллиард теңге бөлініп, техникалық базаны жаңарту үшін бірден 700 жаңа техника сатып алынған.

Алайда ең үлкен сенсация - аймақта іске асырылатын алып инвестициялық жобалар болып отыр. Облыста 2029 жылға дейін құны 112,5 миллиард теңгені құрайтын 19 ірі жоба жүзеге асырылмақ. Оның ішінде биыл ақпан айында іске қосылған 4 миллиардтық «Агролидер KAZ» зауытынан бөлек, Семейде қуаттылығы жылына 11 400 тонна болатын алып ет комбинаты (7,7 млрд теңге) және жылына 72 000 тонна май шығаратын зауыт (8,3 млрд теңге) бой көтереді. Бұдан бөлек, Бескарагай ауданында жылына 150 миллион дана жұмыртқа өндіретін 5,5 миллиардтық алып құс фабрикасы мен Жарма ауданында заманауи тауарлы-сүт фермаларының құрылысы басталмақ. Бұл жобалар аймақта 2100-ден астам жаңа тұрақты жұмыс орнын ашуға мүмкіндік береді.

Сонымен қатар өңірде қой шаруашылығын дамытудың 2030 жылға дейінгі арнайы бағдарламасы қабылданып, оның аясында 300 мың бас асыл тұқымды мал сатып алу және 18 мың басқа арналған 3 бірдей ірі бордақылау алаңын салу көзделуде. Су тапшылығын шешу үшін аймақта 7 жаңа су қоймасы салынып, ондаған гидротехникалық нысандар реконструкцияланады. Жиынды қорытындылаған Берік Уәли ауыл шаруашылығы саласы Президент пен Үкіметтің тікелей бақылауында екенін ескертіп, бұл Төтенше жиын аймақтың ұзақ мерзімді дамуының жаңа іргетасы болатынын қадап айтты.