Абай өңірінде Ұлы Отан соғысының ардагерлері мен тыл еңбеккерлеріне зор құрмет көрсетілді

Абай облысының әкімі Берік Уәли Ұлы Жеңіс мерекесі қарсаңында бейбіт күннің батыры, айтулы мейрам күндері Ресей астанасы Мәскеу қаласында жүрген майдангер Григорий Маларовпен арнайы бейнебайланыс арқылы тілдесіп, оны айтулы мерекемен құттықтады.

Облыс әкімі қазіргі таңда Абай өңірі бойынша ортамызда жүрген жалғыз көзі тірі соғыс ардагеріне Мемлекет басшысы Қасым-Жомарт Тоқаевтың арнайы жолдаған құттықтау хатын жеткізіп, оқып берді.

«Сіздің өмір жолыңыз жас ұрпақ үшін шынайы отансүйгіштіктің үлгісі болып саналады. «Ешкім де ұмытылмайды, ешнәрсе де ұмыт қалмайды» – Жеңіс күнінің барлық мән-мағынасы осы сөздерге сыйып тұр. Халқымыз майдангерлер мен тыл еңбеккерлерінің теңдессіз ерлігін әрдайым есте сақтап, құрметтейтін болады. Барша отандастарымыздың атынан Сізге зор денсаулық пен бақ-береке тілеймін!», – деп жазылған Президенттің ақжарма тілегінде.

Осы орайда қадірлі майдангерге мемлекет қамқорлығы аясында 5 миллион теңге көлемінде біржолғы қаржылай сыйақы табысталды.

Алдағы жаз айларында ғасырлық 100 жас мерейтойын атап өткелі отырған Григорий Маларов небәрі 19 жасында қолына қару алып, қан майданға аттанған болатын. Ол сұрапыл соғыс кезеңінде Екінші Балтық майданының қатарында шайқасып, Эстония және Польша мемлекеттерін жаудан азат ету операцияларына белсене қатысты, сөйтіп жеңісті қадаммен Берлинге дейін жетті. Қанды қырғында көрсеткен өжеттігі мен қайсарлығының арқасында Ұлы Жеңісті жақындатуға сүбелі үлес қосты.

Майданнан оралғаннан кейінгі бейбіт өмірде ардагер Шүлбі су электр станциясында (ГЭС) бас экономист лауазымында жемісті еңбек етті. Еліміздің энергетикалық кешенін өркендетуге сіңірген қажырлы еңбегі мен табандылығы үшін «Ерен еңбегі үшін», сондай-ақ «Еңбек ардагері» төсбелгілерімен марапатталған.

Мұнымен қоса, аймақ басшысы осы күні Семей шаһарында ғұмыр кешіп жатқан тыл ардагерлері Шайхслям Үскенбаев пен Иван Бельгердің шаңырақтарына арнайы барып, ақсақалдарды қасиетті Жеңіс күнімен құттықтап қайтты.

Қанқұйлы соғыс бұрқ ете қалған шақта Шайхслям Үскенбаев небәрі 13 жастағы бозбала еді. Ол кезде отағасы еңбек армиясының қатарына шақырылып, ал анасы ауылда майдангерлерге жылы қолғаптар тоқып, тылдағы тынымсыз шаруашылыққа жегілді. Жасөспірім Шайхслям 14 жасынан бастап колхоздың ауыр жұмысына араласып, тер төкті. Майдан аяқталып, бейбіт заман орнаған соң, ол халық депутаттары кеңесіне қарасты ауылдық кеңестің төрағасы міндетін абыроймен атқарып, халық арасында зор құрметке бөленді. Өңірдің қоғамдық және әлеуметтік саласының өркендеуіне аянбай атсалысты. Қазіргі күні Семей қаласында бала-шағасы мен немерелерінің қызығын көріп, бақытты қарттық кешуде. Тылдағы жанқиярлық еңбегі үшін тоқсан сегіз жастағы ақсақал бірнеше мемлекеттік марапаттарды кеудесіне таққан. Қария мәртебелі мейманға өз ырзашылығын білдіріп, жас ұрпақтың болашағына ақ батасын арнады.

Ал Иван Бельгер болса 1927 жылы туған. Екінші дүниежүзілік соғыс оты тұтанған тұста ол да басқалар секілді еңбекке өте ерте араласты. Сұрапыл соғыс уақытында Қазақ даласына депортацияланған Бельгерлер әулеті алғашында Павлодар облысына келіп түсіп, бертін келе Майқарағайдағы орман шаруашылығына тұрақтады. Иван Иванович он бес жасында ірі жүк көліктерінің рөліне отырып, тылдағы ауыр еңбек майданының бел ортасында жүрді. Кейіннен ол ұзақ жылдар бойы орман шаруашылығында жүргізуші, одан соң механик қызметтерін атқарды. Ал қызмет жолының соңында Екібастұз қаласындағы көміравтоматика мекемесінде бас механик болып жұмыс істеп, жалпы саны 58 жылдық еңбек өтілімен құрметті демалысқа шықты. Бүгінде Семейде тұратын 99 жастағы еңбек ардагерінің өңірінде «Ерен еңбегі үшін», «Тың жерлерді игергені үшін» және «Еңбек ардагері» сынды көптеген құрметті медальдар жарқырайды.

Облыс әкімі тыл ардагерлеріне арнайы ілтипат көрсетіп, олардың жүріп өткен қиын да күрделі өмір жолдары бүгінгі жастар үшін баға жетпес өнеге мектебі екенін ерекше атап өтті.

«Соғыс жылдары бар ауыртпалықты көтеріп, тылда тынымсыз тер төгіп, елдің еңсесін тіктеуге өлшеусіз үлес қостыңыздар. Мереке қарсаңында хал-жағдайларыңызды біліп, облыс жұртшылығы атынан құттықтайық деп арнайы келіп отырмыз. Сіздердің өмір жолдарыңыз кейінгі ұрпаққа үлгі-өнеге, үлкен мектеп», – деді Берік Уәли ақсақалдарға қарата айтқан сөзінде.

Тарих парақтарына көз жүгіртсек, Абай өңірінен жалпы саны 100 мыңға тарта ер-азамат қасиетті Отанды қорғау үшін қан майданға аттанған болатын. Өкінішке қарай, олардың ішінде 44 мыңнан астам боздақ туған жердің топырағына қайта орала алмады. Соғыс даласында жауға қарсы көрсеткен көзсіз батырлығы мен ерен ерліктері үшін 56 жерлесіміз ең жоғарғы «Кеңес Одағының Батыры» деген құрметті атаққа ие болды.