Абай облысындағы үлкен бетбұрыс: 13 мың адам жұмыспен қамтылмақ

Абай облысының әкімдігі мен облыстық прокуратураның ұйымдастыруымен Семей қаласында «Адал адам – адал еңбек» атты кең ауқымды бос жұмыс орындары жәрмеңкесі ұйымдастырылды. Шара Мемлекет басшысының «Адал еңбек – адал азамат» тұжырымдамасын іске асыру шеңберінде өткізілді.

Жәрмеңкенің басты мақсаты — өңірдегі жұмыссыздық деңгейін төмендету және әлеуметтік осал топтағы азаматтарды, соның ішінде мүмкіндігі шектеулі жандарды, пробация қызметінің есебіндегі тұлғаларды және жоғары оқу орындарының түлектерін тұрақты жұмыспен қамтуға ықпал ету.

Абай облысының жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбектің айтуынша, қазіргі таңда облыс бойынша жалпы 685 бос жұмыс орны бар. Оның ішінде аталған жәрмеңкеге қатысқан 34 мекеме 135 нақты вакансияны ұсынды.

Жұмыс іздеушілер жұмыс берушілермен тікелей сұхбаттасып, түйіндемелерін тапсыруға мүмкіндік алды.

Қатысушыларға кәсіптік бағдар беру, қайта даярлау және біліктілікті арттыру курстары бойынша мамандардың кеңесі берілді.

Ерекше қажеттілігі бар жандар мен бас бостандығынан босатылған азаматтарды әлеуметтік бейімдеу және еңбекке тарту мәселелеріне баса назар аударылды.

Ағымдағы жылы Абай облысында барлығы 13 мыңнан астам жаңа жұмыс орнын ашу жоспарланған. Бүгінгі таңда бұл көрсеткіштің 30%-дан астамы орындалды.

Ұйымдастырушылардың пікірінше, мұндай форматтағы шаралар жұмыс беруші мен жұмыс іздеуші арасындағы кедергілерді жойып, аймақтағы әлеуметтік-экономикалық тұрақтылықты нығайтуға мүмкіндік береді.