Абай облысында жүргізуші алты баланы қағып кетті: үшеуі қаза тапты

Абай облысының Үржар ауданына қарасты Бестерек ауылында Toyota автокөлігінің жүргізушісі алты баланы қағып, соның салдарынан үшеуі көз жұмды. Бұл туралы аудандық полиция бөлімі хабарлады.

Жол апаты 19 тамыз күні сағат 16:00 шамасында болған. Алдын ала мәлімет бойынша, 55 жастағы жүргізуші көлікті басқара алмай, жолдан 10 метр қашықтықта, үйдің қақпасы маңында жүрген кәмелетке толмаған балаларды қаққан.

Апат салдарынан екі бала оқиға орнында қаза тапты, тағы біреуі медициналық мекемеге барар жолда жан тапсырды. Үш бала әртүрлі жарақатпен ауруханаға жеткізілді. Полиция мәліметінше, жүргізуші оқиға кезінде мас болмаған. Ол қамауға алынып, уақытша ұстау изоляторына жабылды.

ҚР Президентінің тапсырмасымен Үржар ауданына Қорғаныс министрлігінің С-295 әскери-транспорттық ұшағы жіберілді. Оның бортында реаниматолог, нейрохирург және травматолог бар медициналық бригада келді.

Абай облыстық денсаулық сақтау басқармасының мәліметінше, зардап шеккен үш баланың жағдайы ауыр. Дәрігерлер тарапынан барлық қажетті медициналық көмек көрсетіліп жатыр. Жағдай басқарманың қатаң бақылауында.