Абай облысында су электр станцияларының құрылысы бойынша инвестициялық жоба қолға алынбақ

Ертіс өзенінің бойында алып энергетикалық жоба қолға алынбақ. Абай облысының әкімі Берік Уәли «JelSu Energy» компаниясы директорлар кеңесінің төрағасы Шыңғыс Құлжанов бастаған инвесторлармен кездесіп, аймақ болашағын өзгертетін маңызды құжатқа қол қойды, деп хабарлайды Абай облысы әкімінің баспасөз қызметі.

Кездесу қорытындысы бойынша, аймақ басшысы мен «JelSu Energy» директоры Әділет Кенжебеков өзара түсіністік пен ынтымақтастық меморандумына мөр басты. Осы келісім аясында Ертіс өзенінде жалпы қуаты 900 МВт болатын Белокаменск, Ақжар және Известков ГЭС-тері салынбақ. Бұл алып жобалар кезең-кезеңімен жүзеге асырылып, техникалық-экономикалық негіздеме әзірлеуді, инженерлік инфрақұрылымды дамытуды және мыңдаған жаңа жұмыс орындарын ашуды көздейді.

«Абай облысы бүгінде инвестиция тарту бойынша елде көш бастап тұр. Сондықтан біз өткен жылы-ақ осы өңірге қаржы құю туралы шешім қабылдадық. Энергетика — басты салалардың бірі, ал электр энергиясын өндірудің маңызы ерекше. Біз Абай облысының гидроэнергетикасын дамытуға үлес қосуға дайынбыз. Бұл саланың серпіні ауыл шаруашылығына, балық кәсібіне, туризм мен білім саласына үлкен серпіліс әкеледі. Өңірге гидротехника мамандары тартылатын болады», – деп атап өтті Шыңғыс Құлжанов.

Облыс әкімі Берік Уәли инвесторларға алғыс айтып, Мемлекет басшысы Қасым-Жомарт Тоқаевтың энергетикалық қауіпсіздік пен жаңартылатын энергия көздерін дамытуға ерекше мән беретінін жеткізді.

 «Бұл жобалар біздің аймақ үшін стратегиялық маңызға ие. Бүгінгі кездесу - қаңтар айында басталған келіссөздердің заңды жалғасы. Біз бірлесіп жұмыс істеуге толықтай дайынбыз», - деді аймақ басшысы.

Айта кетейік, Абай облысында инвестиция тарту бағытында жүйелі жұмыстар атқарылуда: 2025 жылдың басынан бері инвестициялық пулға енген жобалар саны 29-дан 112-ге дейін, ал инвестиция көлемі 2,2 триллионнан 4,3 триллион теңгеге дейін өскен. Биылдың өзінде құны 131,2 миллиард теңге болатын 41 жобаны іске асыру жоспарланып отыр.