Абай облысында сарбаз өлімі ісі бойынша сотталған дәрігер амнистиямен босатылды

Абай облысында мерзімді әскери қызмет кезінде жағдайы нашарлап, ауруханада көз жұмған сарбаздың ісі бойынша сотталған дәрігер амнистияға ілініп, жазадан босатылды. Бұл туралы Tengrinews хабарлады.

Сот материалдарына сәйкес, 20 жастағы сарбаздың өліміне байланысты айыпты деп танылған Аягөз әскери госпиталінің емхана бөлімінің бастығы Семей гарнизонының әскери сотының үкімімен екі жылға бас бостандығынан айырылған. Сондай-ақ оған екі жыл мерзімге медициналық қызметпен айналысуға тыйым салынған.

Алайда сот сотталушының үш баласы барын және қылмыстың ауырлығы төмен санатқа жататынын ескеріп, оған амнистия туралы заңды қолданған.

Марқұм сарбаз былтыр сәуірде Солтүстік Қазақстан облысынан әскерге шақырылған. 16 мамыр күні қызуы көтеріліп, жағдайы нашарлаған соң Аягөз әскери госпиталіне жеткізілген. Дәрігер оған назофарингит диагнозын қойып, ауруханаға жатқызған. Алайда сарбаздың жағдайы нашарлап, 19 мамырда аудандық аурухананың жансақтау бөлімінде көз жұмған.

Сот-медициналық сараптама қорытындысына сәйкес, жауынгердің өліміне екі жақты іріңді отиттен кейін асқынған іріңді менингит себеп болған. Сарапшылардың айтуынша, егер 16 мамырда дұрыс диагноз қойылып, уақытында ем басталғанда, сарбазды аман алып қалуға болар еді.

Дәрігер «Медицина қызметкерінің кәсіптік міндеттерін тиісінше орындамауынан абайсызда адам өліміне әкеп соғу» бабы бойынша жауапқа тартылған.

Сот жәбірленуші тараптың азаматтық талап-арызын ішінара қанағаттандырып, сотталған адамнан моральдық, материалдық және өкілдік шығын ретінде 12 миллион теңгеден астам қаражат өндіру туралы шешім шығарды.