Абай облысында балаларды қағып кеткен көлік оқиғасынан тағы бір бала өмірден өтті

Абай облысының Бестерек ауылында 19 тамызда болған жол апатынан ауыр жарақат алған 9 жастағы қыз бала Семейдегі ауруханада қайтыс болды. Бұл туралы облыстық денсаулық сақтау басқармасы хабарлады, деп жазды Kazinform.

«Науқастың жағдайы бастапқыдан өте ауыр болды. Дәрігерлер бірнеше апта бойы оның өмірі үшін күресті, алайда жарақаттары тым ауыр еді. Ол есін жимастан көз жұмды», – делінген басқарма мәлімдемесінде.

Еске салайық, 19 тамыз күні Абай облысының Үржар ауданында 55 жастағы жүргізуші үй ауласында ойнап жүрген алты баланы қағып кеткен. Апат салдарынан үшеуі оқиға орнында көз жұмды. Ең кішкентайы екі жаста, ең үлкені сегіз жаста болған.

Тағы үш бала ауыр жарақатпен ауруханаға жеткізілді: олардың бас сүйегі сынған, аяқ-қол және ішкі ағзалары зақымданған. Кейін екеуі санитарлық авиациямен Астанаға жеткізіліп, емделіп шыққан. Ал ең ауыр халдегі 9 жастағы қызды Семейдегі медицина университетінің ауруханасына апарған болатын.

Жол апатына себеп болған жүргізуші екі айға қамауға алынды. Оның туыстарының айтуынша, ер адам сол сәтте жүрек талмасына ұшыраған.

Қайғылы оқиғаға байланысты Президенттің тапсырмасымен өңірге Астанадан арнайы медициналық мамандар жіберілген еді. Алайда барлық ем-домға қарамастан, қыз баланы аман алып қалу мүмкін болмады.