Абай облысында 20 жастағы қызға 12 рет пышақ сұғып өлтірген

Абай облысының Бородулиха ауылында 20 жастағы Ділназ есімді қыз өлтірілді. Туыстарының айтуынша, күдікті – онымен бұрын кездескен 20 жастағы жігіт. Қылмыстық іс бойынша тергеу аяқталған, деп хабарлады «Жетінші арна».

Оқиға 13 шілдеге қараған түні болған. Арна мәліметінше, күдікті қыздың басынан бірнеше рет теуіп, оған пышақ жарақаттарын салған. Кейін денесін 32 метр жерге сүйреп апарған. Қыздың денесін таңертең жергілікті тұрғын тауып алған.

Марқұмның анасы Динара Атаеваның сөзінше, қызына 12 рет пышақ сұғылған, соның салдарынан қан тамырлары зақымданып, өкпесіне жарақат түскен.

«Мәйітханадан алып келгенде қызымның бетін де ашып көрсетпеді. Беті өте ауыр жағдайда болғандықтан, маған қарауға рұқсат бермеді», – деді марқұмның анасы.

Күдікті ұсталған. Ол 20 жаста және Ділназбен бір мектепте оқыған. Анасының айтуынша, екеуі бұрын кездескен, кейін араласуды тоқтатқан.

Іс Қылмыстық кодекстің 99-бабы – «Адам өлтіру» бойынша қозғалған. Тергеу аяқталған.

Марқұмның анасы қылмыс аса қатыгездікпен жасалды деп есептейді. Сондықтан отбасы күдіктінің әрекетін Қылмыстық кодекстің 99-бабының бірінші бөлігімен емес, екінші бөлігімен саралауды талап етіп отыр.