Абай облысына 232 миллиард теңге жеке инвестиция тартылып, өңірде жаңа жұмыс орындары ашылды

Абай облысының әкімі Берік Уәлидің төрағалығымен өткен аймақ әкімдігінің отырысында өңірдің 2026 жылдың бірінші жартыжылдығындағы әлеуметтік-экономикалық даму қорытындылары мен «Таза Қазақстан» экологиялық бағдарламасының орындалу барысы сарапқа салынды. Жиынға өңірлік департамент жетекшілері, басқарма басшылары мен қала, аудан әкімдері қатысты, деп хабарлайды Абай облысы әкімінің баспасөз қызметі. 

Облыс әкімінің бірінші орынбасары Ербол Садырдың баяндамасына сәйкес, бірінші тоқсанда өңірдің жалпы өңірлік өнімі өткен жылдың сәйкес кезеңімен салыстырғанда 103,7 пайызға өскен. Сонымен қатар, қысқа мерзімді экономикалық индикатор 4,2 пайыздық өсімді көрсетті. Атап айтқанда, құрылыс саласы 131 пайызды құрап, республика бойынша 3-орынға шықса, көлік саласы 117,8 пайыздық өсіммен ел ішіндегі үштікті түйіндеді. Сонымен бірге инвестиция (123,2%), ішкі сауда (105,1%), ауыл шаруашылығы (103,7%), өнеркәсіп (101,5%) және байланыс салаларында (101%) оң динамика қалыптасты.

Алты айдың қорытындысы бойынша жергілікті бюджет түсімдері 82,8 млрд теңгені құрап, жоспарланған межеден 1,5 млрд теңгеге асыра орындалды. Бюджет қаражатының игерілу деңгейі 99,7 пайызды құрады. Аймақ экономикасына тартылған инвестиция көлемі 232,3 млрд теңгеге жетіп, еліміздің өңірлері арасында 4-орынға тұрақтады. Әсіресе, жеке инвестициялардың өсу қарқыны айрықша байқалды: бұл көрсеткіш 151,4 пайызға жетіп, 205,6 млрд теңгені құрады.

Есепті кезеңде жалпы құны 34,6 млрд теңге болатын 14 инвестициялық жоба іске қосылып, 598 жаңа жұмыс орны құрылды. Тұрғын үй секторында 128,3 мың шаршы метр баспана пайдалануға берілді, бұл өткен жылмен салыстырғанда 5,5 мың шаршы метрге артық.

Отырыста аудан мен қала әкімдерінің қызметін 10 блок пен 83 индикатор бойынша бағалайтын рейтинг нәтижелері жарияланды. Көш басынан Жаңасемей, Мақаншы және Абай аудандары көрінсе, рейтингтің төменгі сатысына Ақсуат, Көкпекті аудандары мен Курчатов қаласы жайғасты. Облыс әкімі көрсеткіштері төмен аудан, қала басшыларының есебін тыңдап, жұмысты шұғыл түрде күшейтуді тапсырды.

Берік Уәли өз сөзінде әрбір көрсеткіштің артында халықтың әл-ауқаты мен нақты өндіріс тұрғанын атап өтіп, жыл соңына дейін барлық индикаторлардың орындалуын қамтамасыз етуді міндеттеді. Сонымен қатар, тоғыз айдың қорытындысы бойынша жоспарлы межені бағындырмаған басшыларға қатысты тиісті шаралар қолданылатыны ескертілді.