Абай облысында ветеринария саласы бір сәтте 53 автокөлікпен қамтамасыз етілді

Абай облысының агроөнеркәсіп пен ветеринария саласында ауқымды да тарихи оқиға орын алды. Семей қаласындағы Шәкәрім университетінің қабырғасында Ветеринария қызметкерлері күніне орай салтанатты жиын өтіп, өңірдің ауыл шаруашылығын алға дамытып отырған мамандарға үлкен қолдау көрсетілді. Жиынға арнайы қатысқан аймақ басшысы Берік Уәли сала ардагерлері мен қызметкерлерін төл мерекелерімен құттықтап, олардың еңбегі азық-түлік қауіпсіздігі мен ел амандығының негізгі тиегі екенін айрықша атап өтті.

Салтанатты шараның ең негізгі сенсациясы - облыстық және аудандық ветеринариялық қызметтерге бір мезетте 53 су жаңа қызметтік автокөліктің кілті салтанатты түрде табысталуы болды. Белгілі болғандай, өңірдегі мал дәрігерлерінің материалдық-техникалық базасы соңғы рет алыс 2013 жылы ғана жаңартылған екен. Он жылдан астам уақыт бойы ескірген, тозығы жеткен техникамен жұмыс істеп келген мамандар үшін бұл нағыз күтпеген әрі қуанышты сыйлық болды. Ендігі жерде бұл техникалар шалғайдағы ауылдық округтерге жедел жетуге, мал ауруларының алдын алуға және түрлі ветеринариялық шараларды өз уақытында, сапалы жүргізуге жол ашады.

Арнайы бөлінген автопарктің құрамы да өте бай. Атап айтқанда, мекемелерге жол таңдамайтын 12 JAC T-8 маркалы жол талғамайтын көлігі, ауылдық пункт меңгерушілеріне 30 «Нива» автокөлігі мен мал тасымалдауға арналған 5 арнайы техника, сонымен қатар дезинфекция жүргізетін 5 машина мен арнайы препараттарды тасымалдайтын 1 көлік берілді. Мұнымен қоса, материалдық базаны толықтай жаңарту мақсатында 77 тоңазытқыш, 260 термочемодан және 74 заманауи компьютер жиынтығы таратылды.

Мерекеде өңірдің дамуына өлшеусіз үлес қосқан үздік мамандар да назардан тыс қалмады. Сала үздіктері Ауыл шаруашылығы министрлігінің «Еңбек ардагері» медалімен, Құрмет грамоталарымен, «Абай облысына сіңірген еңбегі үшін» төсбелгілерімен және аймақ басшысының Алғыс хаттарымен марапатталды.

Облыс басшылығы бұл қолдаудың тек басы екенін білдірді. Қазіргі таңда өңірде 7 ветеринариялық станция, 61 пункт және 40 мал қорымының құрылысы қарқынды жүріп жатыр. Ал 2027 жылға дейін тағы 50 пункт пен 78 мал қорымын пайдалануға беру жоспарланған. Сонымен қатар, саладағы кадр тапшылығын жою мақсатында өңір әкімдігі бөлген білім гранттарының саны 19-ға дейін көбейтіліп, жастарды мал дәрігері мамандығына баулу ісі жаңа серпін алды.