86 мың адам алданып қалған қаржы пирамидасының жұмысы тоқтатылды

Қаржылық мониторинг агенттігі Бас прокуратураның үйлестіруімен "Asar Baspana" қаржы пирамидасының қызметін тоқтатты. Пирамида тұтынушылық кооператив ретінде жасырын жұмыс істеген.

Тергеу барысында анықталғандай, Туғанбаев Н.М. бастаған пирамида ұйымдастырушылары 86 мыңнан астам азаматтан 12,4 млрд теңге тартқан. Олар салымшыларға ай сайын 30%-ға дейін табыс уәде еткен.

Туғанбаев пен оның серіктестері 3,8 млрд теңгені заңсыз иеленген. Олар салымшыларды алдап, Алматыда құрылыс материалдарын өндіру, тігін цехы мен тұрмыстық және медициналық техника зауыты жұмыс істейді деп мәлімдеген. Бірақ шын мәнінде, өнімдер үшінші тарап жеткізушілерінен сатып алынып, "Asar Baspana" логотипімен таңбаланған.

2024 жылдың желтоқсан айынан бастап пирамиданың сенімділігі төмендей бастаған кезде ұйымдастырушылар автосалон ашып, ресми дилерлермен әріптестік орнаттық деп ақпарат таратқан. Алайда автокөліктер салымшылардың ақшасына сатып алынып, Туғанбаевтың туыстарына рәсімделген.

Пирамиданың былығы әшкере болар сәтте, 8 ақпанда Туғанбаев "Asar Baspana" сайтын техникалық режимге ауыстырған. Бірақ тергеу барысында серверлік деректер қалпына келтірілді. Деректерге сәйкес, "Gold" деңгейіне жеткен 15,5 мың салымшының тек біреуіне ғана пәтер берілген. Ал "Platina" бағдарламасы бойынша 15 мың үміткердің арасынан бір ғана салымшы көлік алған.

2025 жылғы 9 ақпанда 49 кеңседе және 81 күдіктінің тұрғылықты жерінде тінту жүргізілді.
🔹 1,1 млрд теңге қолма-қол ақша тәркіленді;
🔹 Toyota Land Cruiser 300 және Lexus 570 маркалы 10 премиум-класс көлік алынды;
🔹 Ақтаудағы Туғанбаевтың туысының үйінен кооператив есепшоттарында болуы тиіс 945 млн теңге қолма-қол ақша табылды;
🔹 1,2 млрд теңгеден астам сомаға шоттар бұғатталды.

2025 жылғы 11 ақпанда Туғанбаев Н.М. мен Байтасов Н.-ға қатысты 2 айға қамауға алу түріндегі бұлтартпау шарасы қабылданды. Қазір сотқа дейінгі тергеу жүргізіліп жатыр.