84 медаль және үш саты жоғары: Қазақстан Азия ойындарын қалай аяқтады

Қазақстан құрамасы Жапонияда өтіп жатқан ХХ жазғы Азия ойындарын 12 алтын, 24 күміс және 48 қола – барлығы 84 медальмен аяқтап, 46 елдің арасында жалпыкомандалық есепте сегізінші орынға тұрақтады, деп хабарлады Туризм және спорт министрлігі.

Алдыңғы, 2023 жылы Ханчжоуда өткен Азия ойындарында Қазақстан 11-орын алған еді. Осылайша биыл ұлттық құрама жалпы есепте үш саты жоғары көтеріліп, алтын медаль санын да арттырды. Жарыстың жабылу салтанаты 4 қазанда өтеді.

Бокста 12 жыл күткен алтын

Қазақстан боксшылары Азия ойындарының алтынын 12 жылдан кейін қайта жеңіп алды. Бұған дейін соңғы чемпиондар 2014 жылғы Инчхон Азиадасында шыққан, ал 2018 және 2023 жылдардағы ойындарда Қазақстан бокстан алтынсыз қалған еді.

Жапонияда бұл үзілісті Төрехан Сабырхан тоқтатты. Ол 70 келіге дейінгі салмақта чемпион атанды. Кейін ұлттық құраманың капитаны Айбек Оралбай +90 келіде жеңіске жетіп, Қазақстанға бокстан екінші алтынды әкелді.

Семсерлесу, есу және таеквондода тарихи нәтиже

Сапымен семсерлесуден Қазақстан ерлер құрамасы Азия ойындары тарихындағы алғашқы алтынын жеңіп алды. Финалда қазақстандықтар Оңтүстік Корея құрамасын 43:42 есебімен ұтты. Министрлік мәліметінше, Қазақстан семсерлесушілері бір маусымда Азия чемпионатын, әлем чемпионатын және Азия ойындарын жеңіп алған алғашқы құрама болды.

Академиялық есуден Владислав Яковлев пен Иван Чернухин ерлер арасындағы қос ескекті қайық жарысында топ жарып, Қазақстанға осы спорт түрінен Азиададағы алғашқы алтынды әкелді.

Таеквондошы Тамирлан Тілеулес те 58 келіге дейінгі салмақта чемпион атанды. Туризм және спорт министрлігі мұны Қазақстанның таеквондодан Азия ойындарындағы тұңғыш алтын медалі деп атады.

Луценко алтын санын алтыға жеткізді

Велошабандоз Алексей Луценко жазғы Азия ойындарындағы алтын медальдарының санын алтыға жеткізді. Министрлік оны Азиададағы жеңіс саны бойынша Қазақстанның ең табысты спортшысы деп атады.

Рината Сұлтанова да жекелей жарыста жеңіске жетіп, Қазақстан әйелдер велоспорты тарихында Азия ойындарының алтынын алған алғашқы спортшы атанды.

Каратэден Жоламан Биғабыл мен Софья Берульцева чемпион атанды. Берульцева үшін бұл – Азия ойындарындағы екінші алтын.

Азиада бағдарламасына алғаш рет қосылған аралас жекпе-жекте Еркінғали Бүркітәлі мен Қадырбек Шынбаев алтын, Санжар Әділов қола медаль жеңіп алды.

Дзюдошылар бес финалда Жапониямен кездесті

Қазақстан дзюдошылары жекелей сында алғаш рет төрт финалға шықты. Елдос Сметов, Әбиба Әбужақынова, Әділет Алмат және Ажар Асхат шешуші белдесулерде жапониялық қарсыластарына жол беріп, күміс жүлдегер атанды.

Аралас командалық сында да Қазақстан күміс алды. Осылайша қазақстандық дзюдошылар қатысқан бес финалдың бәрінде қарсылас Жапония құрамасының өкілдері болды.

Спорттық гимнастикада Милад Карими еркін жаттығудан күміс алып, Қазақстанға осы бағдарлама бойынша 32 жылдан кейін Азия ойындарының жүлдесін әкелді.

Кей федерациялардағы жұмыс қайта қаралуы мүмкін

Туризм және спорт министрлігі Азиада алдында спорт федерациялары ұлттық құрамалардың нәтижесіне қатысты нақты міндеттемелер алғанын мәлімдеді. Енді ведомство сол міндеттемелердің қаншалық орындалғанын талдамақ.

Нәтижелер алдыңғы халықаралық жарыстармен салыстырылып, көрсеткіштерге әсер еткен себептер сараланады. Егер кей спорт түрлеріндегі қазіргі дайындық жүйесі күткен нәтиже бермегені анықталса, министрлік тиісті шешімдер қабылдайтынын хабарлады.

Қажет болған жағдайда жекелеген федерациялардың жұмыс тәсілдері толық қайта қаралуы мүмкін.