8,5 миллион теңге: Ауылға жұмысқа тұрған жас дәрігерлерге уәде етілген көмек берілмеген

2024 жылы ауылдық жерлерге жұмыс істеуге барған жас дәрігерлердің үштен бірі мемлекеттен уәде етілген көтерме төлемді ала алмаған. Бұл туралы Денсаулық сақтау министрі Ақмарал Әлназарова мәлімдеді, дейді informburo.kz

Ресми дерек бойынша, ауылға жолданған 370 жас маманның тек 254-і ғана біржолғы материалдық көмек алған. Ал 116 дәрігер тиісті төлемсіз қалған. Министрдің айтуынша, мұндай жағдай әсіресе Ақмола, Жамбыл, Батыс Қазақстан және Абай облыстарында жиі кездеседі.

"Кейбір өңірлерде бұл шығындар жергілікті бюджеттен қарастырылмаған. Сондықтан дәрігерлерге көмек берілмей қалды", – деді Әлназарова.

Қазіргі уақытта мемлекет ауылға қоныс аударған қажетті мамандық иелеріне 1,5 млн теңгеден бастап, 8,5 млн теңгеге дейін біржолғы төлем қарастырған. Алайда бұл көмек барлық аймақта жүйелі түрде жүзеге аспай отыр.

Мемлекет дәрігер жетіспейтін ауылдарға жас мамандарды тартуға тырысып жатыр. Бірақ уәде етілген қаржылай көмектің толық берілмеуі олардың ауылда ұзақ жұмыс істеуіне кері әсер етуі мүмкін.

Автор: Рахат Жора