7 трлн теңге ісі: Ұлттық банк төрағасы орынбасарының қызметінен кетуіне байланысты пікір білдірді

Ұлттық банк төрағасы Тимур Сүлейменовтің айтуынша, оның орынбасары Берік Шолпанқұлов қызметінен өз еркімен кеткен. Бұл туралы ол брифинг барысында мәлімдеді.

Журналистер Шолпанқұловтың отставкасы оның жуырда жасаған мәлімдемесімен байланысты ма деген сұрақ қойды. Бұған дейін ол көрші елден 7 трлн теңге шетелге шығарылған банк туралы пікір білдірген болатын.

– Берік Шолпанқұлов өз өтініші бойынша жұмыстан кетті. Яғни ол қызметтен жеке өтініші негізінде босатылды. Бұған қосар ештеңем жоқ. Ал банкке қатысты айтсақ, біз хабарлағандай, тексеріс жүргізіліп жатыр. Қосымша мәліметтер тексеріс аяқталғаннан кейін белгілі болады, – деді Тимур Сүлейменов.

Ұлттық банк төрағасынан тексеріс қанша уақытқа созылуы мүмкін екені де сұралды. Оның айтуынша, бұл тексерісті Қаржы нарығын реттеу және дамыту агенттігі жүргізіп жатыр, сондықтан оның мерзімін сол ведомство анықтайды.

Журналистер Шолпанқұловтың банк қызметінде алдын ала заң бұзушылықтар анықталмағаны туралы айтқан пікірі қаншалықты дұрыс екенін де сұрады.

– Тексеріс аяқталмай тұрып нақты қорытынды жасауға әлі ерте. Тексеру толық аяқталғаннан кейін тиісті қорытынды жасаймыз, – деді Сүлейменов.

Еске салайық, бұған дейін Қаржылық мониторинг агенттігінде өткен кеңесте Президент Қасым-Жомарт Тоқаев қазақстандық банктердің бірі көрші елден 7 трлн теңгеден астам қаражаттың басқа мемлекеттерге шығарылуына көмектескенін айтқан еді.

Кейін Ұлттық банк төрағасының орынбасары Берік Шолпанқұлов бұл сома нақты аударым емес, банктің жалпы айналымы екенін түсіндірген. Оның айтуынша, алдын ала тексеріс барысында заң бұзушылықтар анықталмаған. Алайда араға бір күн салып ол қызметінен кеткен.