7 млн-ға дейін жетеді: Елімізде басшылық қызметтегілер қанша табады?

Қазақстанда түрлі саладағы басшылардың орташа жалақысы 2025 жылдың қазан айындағы мәлімет бойынша 1 млн теңге болды. Бұл дерек Ұлттық статистика бюросының есебінде келтірілген.

Алайда жалақы көлемі сала ерекшелігіне қарай өзгереді: әлеуметтік секторда шамамен 600 мың теңге, ал қаржы саласында 2 млн теңгеге дейін жетеді.

Өнеркәсіп

Кен өндіру саласында басшылардың орташа айлығы 1,9 млн теңге. Комбинаттардың директорлары мен бас директорлары 3–4 млн теңге алады.

Өңдеу өнеркәсібінде орташа жалақы 1,5 млн теңге шамасында. Зауыт директорлары 2 млн теңге, ал компания президенттері 5,3 млн теңге алады.

Энергетика мен газ саласында басшылардың айлығы 1,1 млн теңге, ал су және қалдықтарды басқару бағытында бұл көрсеткіш 775,8 мың теңге.

Құрылыс және көлік

Құрылыс компанияларындағы басшылардың орташа табысы 1,47 млн теңге. Жобалау және конструкторлық ұйымдардың директорларының жалақысы ең жоғары – 7,3 млн теңге.

Көлік және логистика саласында басшылардың айлығы орта есеппен 1,3 млн теңге. Аймақтық директорлар 3,8 млн теңге, инвестициялық жобалар директоры 2,9 млн теңге алады.

Сауда және ауыл шаруашылығы

Ауыл, орман және балық шаруашылығында басшылардың орташа жалақысы 881 мың теңге. Кеңесші лауазымындағы қызметкерлердің табысы 2,2 млн теңге, ал бас директорлар 1,5 млн теңге алады.

Сауда және автокөлік жөндеу саласында басшылардың орташа айлығы 1,4 млн теңге. Сауда орталығы директорлары 3,9 млн теңге, ал PR-бөлім жетекшілері 3,5 млн теңге шамасында табыс табады.

Қызмет көрсету саласы

Қонақүй мен қоғамдық тамақтану саласында басшылардың орташа айлығы 1,5 млн теңге. Бас директорлар 3 млн теңге, қаржы директорлары 2,5 млн теңге, кадр және даму жөніндегі директорлар 2–3,3 млн теңге алады. Қонақүй директорларының табысы 949 мың теңге, мейрамхана директорлары 531 мың теңге алады.

Ақпарат және қаржы

Ақпарат және байланыс саласында басшылардың орташа жалақысы 1,47 млн теңге. Зерттеу және инновация бағыты бойынша техникалық директорлардың айлығы 6 млн теңге, ал басқа техникалық директорлар 2,6 млн теңге алады.

Қаржы және сақтандыру секторында басшылардың орташа жалақысы 2,1 млн теңге. Басқарма төрағалары 5,6 млн теңге, қаржы директорлары 1,9 млн теңге, аймақтық директорлар 2,5 млн теңге шамасында табыс табады.

Әлеуметтік сала

Білім беру саласындағы басшылардың орташа айлығы 696 мың теңге. Ректорлардың жалақысы 1,4 млн теңге, мектеп директорларының айлығы 531 мың теңге.

Денсаулық сақтау және әлеуметтік қызмет көрсету саласында орташа табыс 607 мың теңге. Бас дәрігерлердің жалақысы 764 мың теңге, ғылыми институт директорлары 1,1 млн теңге, ал басқарма төрағалары 1,97 млн теңге алады.

Мамандардың пікірінше, басшылардың табыс айырмашылығы әр саланың табыстылық деңгейі мен бәсекелестік жағдайына және ұйымның меншік нысанына тікелей байланысты.