69 баланың өмірі қиылды: Судағы демалыс қайғылы жағдайға ұласып жатыр

Қазақстанда шомылу маусымы басталғалы бері су айдындарында 69 бала қаза тапты, деп хабарлайды Ішкі істер министрлігі. ІІМ жазғы демалыс кезінде ата-аналарды балалардың қауіпсіздігін қатаң бақылауға алуға шақырып отыр.

Ведомство деректеріне сүйенсек, қайғылы оқиғалардың басым бөлігі шомылуға тыйым салынған немесе арнайы жабдықталмаған орындарда орын алған. Мұндай аймақтарда су түбі тексерілмеген, ағысы қатты, шұңқырлар мен су асты иірімдері болуы мүмкін.

Мамандар балалардың қараусыз қалуына ересектердің демалыс кезіндегі салғырттығы басты себеп екенін атап өтті. Атап айтқанда, спирттік ішімдіктерді қолдану ата-аналардың қырағылығын төмендетіп, балалардың назардан тыс қалуына әкеп соғады.

Сонымен қатар  дәрігерлер мен құтқарушылар ауа райының ыстық кезінде суға түсудің қаупіне назар аударады. Суық суға бірден түсу ағзадағы температураның күрт өзгеруіне, тамырлардың түйілуіне және бұлшықеттердің тартылуына (судорога) себеп болуы мүмкін.

ІІМ Қоғамдық қауіпсіздік комитетінің төрағасы Арман Садановтың мәліметінше, жыл басынан бері тыйым салынған жерлерде шомылғаны үшін (ҚР ӘҚБтК-нің 364-бабы) 2 700-ден астам азамат әкімшілік жауапкершілікке тартылды.

Министрлік өкілдері ата-аналарға мынадай кеңестер береді:

•  Тек арнайы жабдықталған және шомылуға рұқсат етілген жағажайларды ғана пайдалану;
• Балаларды су жағасында ешқашан қараусыз қалдырмау;
• Балаларға су астындағы қауіптер (қатты ағыс, қоқыстар, терең шұңқырлар) туралы түсіндіру жұмыстарын жүргізу.

Құзырлы орган азаматтарды қауіпсіздік ережелерін қатаң сақтауға және балалардың өміріне жауапкершілікпен қарауға шақырады.