60 мыңға жуық науқас тегін дәріден қағылуы мүмкін

Қазақстанда әлеуметтік маңызы бар аурулар тізіміне енгізілген өзгерістерден кейін 60 мыңға жуық адам тегін дәрі-дәрмек алу құқығынан айырылуы ықтимал. Бұл туралы денсаулық сақтау вице-министрі Тимур Мұратов Үкіметтегі брифингте мәлімдеді.

Оның айтуынша, бұл өзгерістер азаматтарды дәрімен немесе медициналық көмекпен қамтамасыз етуді тоқтату дегенді білдірмейді.

«Мейлі ол фельдшер болсын, министр немесе вице-министр болсын, ешбір медицина қызметкері азаматтардың жағдайын қиындату үшін жұмысқа келмейді. Бұл бұйрықтар – министрліктің ішкі құжаты, ол тек ішкі рәсімдерді реттеуге бағытталған. Біз тек бір пакетті екіншісіне ауыстырдық. Иә, белгілі бір топтардың сақтандырусыз қалу қаупі бар, бірақ оған да алдын ала шаралар қарастырылған», – деді Мұратов.

Вице-министрдің мәліметінше, «Д» және «Е» санатындағы азаматтарға дәрі-дәрмек сатып алу міндеті жергілікті атқарушы органдарға жүктеледі. Ал жұмыссыз қалған азаматтар өздеріне уақытша жұмыссыз мәртебесін рәсімдей алады. Бұл жағдайда міндетті әлеуметтік медициналық сақтандыру жүйесіне жарнаны мемлекет төлейді.

«Жалпы осындай тәуекел тобына кіретін азаматтардың саны – шамамен 50–60 мың адам. Оларды да сақтандыру жүйесі арқылы немесе басқа тетіктермен қамту жолдарын қарастырамыз», – деді Мұратов.