55 жастағы ұстаз Айгүл Ержанова 13,5 тонналық автобусты сүйреп, әлем рекордын жаңартты

Елордадағы «№1 Автобус паркі» АҚ аумағында ауыр атлетикадан әлем чемпионы, 55 жастағы бастауыш сынып мұғалімі Айгүл Ержанованың кезекті рекорд орнату рәсімі өтті. Спортшы салмағы 13,5 тоннаны құрайтын автобусты жалғыз өзі сүйреп, әлемдік рекордты жаңартты.

Ресми іс-шараға бұқаралық ақпарат құралдарының өкілдері, автопарк қызметкерлері және халықаралық дәрежедегі сарапшылар қатысты. Рекордты тіркеу алдында Азия мен Африка бойынша GLOBAL BEST RECORDS (GBR) ұйымының бас тіркеу офицері Қуандық Құдайбергенов техникалық құралдар мен таңдалған алаңның халықаралық талаптарға сәйкестігін тексеріп, рәсімді өткізуге ресми рұқсат берді.

Арнайы дайындықпен келген ауыр атлет бұл сынақты жоғары деңгейде орындап шықты. Айгүл Ержанова автобусты буксирлеуді сағат 09:49-да бастап, 09:50-де аяқтады. Ол 1 минут ішінде 10 метрден астам қашықтықты бағындырды. Нәтижесінде GBR ұйымының ресми өкілі Қуандық Шыңғысұлы спортшының жетістігін тіркеп, оған ұйымның алтын медалін табыс етті.

Айгүл Ержанова — спорт пен педагогика саласын қатар алып жүрген тұлға. Ол Астана қаласындағы №50 мектептің бастауыш сынып мұғалімі. Білім беру саласындағы ерен еңбегі үшін бұған дейін Қазақстан Республикасының Президенті Қасым-Жомарт Тоқаевтың Жарлығымен «Қазақстанның еңбек сіңірген ұстазы» құрметті атағымен марапатталған.

Спорттық мансабын 1,5 жыл бұрын ғана бастағанына қарамастан, ол бүгінде ауыр атлетикадан 45 медаль иегері атанып, 8 рекорд орнатқан. Сондай-ақ ауыр жүк көліктерін сүйреу бойынша Рекордтар кітабына енген.

«№1 Автобус паркі» АҚ өкілдерінің мәлімдеуінше, бұл іс-шара қоғамда бұқаралық спортты қолдау, салауатты өмір салтын насихаттау және еңбек адамдарын үлгі ету мақсатында ұйымдастырылды. Шараға қатысушылар бұл жетістіктің адамның ерік-жігері мен мақсатқа ұмтылысының жарқын көрінісі екенін атап өтті.