540 млн теңге пара: ҚТЖ-ның еншілес компаниясының басшысы ұсталғаны рас па?

Алматыдағы «Қазтеміртранс» АҚ филиалының директоры Ақылбек Базеновтің ұсталғаны туралы ақпаратқа байланысты компания ресми түсініктеме берді.

Компания мәліметінше, қазіргі уақытта құзырлы құқық қорғау органдары тергеу амалдарын жүргізіп жатыр.

– Компания уәкілетті органдарға жан-жақты қолдау көрсетіп, тергеу аясында барлық қажетті ақпарат пен құжаттарды ұсынып отыр, – деп хабарлады «Қазтеміртранс» баспасөз қызметі.

Сонымен қатар компания нысандарды күзету бойынша мемлекеттік сатып алуларға ықпал ету үшін ірі көлемде пара алды деген ақпараттың күмән тудыратынын айтты.

«Қазтеміртранс» мәліметінше, күзет қызметін көрсетуге қатысты келісімшарттарды жасасу рәсімдері толық аяқталған. Жалпы күзет қызметіне шамамен 200 млн теңге қарастырылған. Ал Алматы филиалының өндірістік базаларын күзетуге биыл 9 млн теңгеден астам қаржы бөлінген.

– Бұл сома аталған бағыт бойынша пара ретінде айтылып жатқан қаржы көлемінен әлдеқайда аз. Қалған мән-жайлар тергеу барысында анықталады, – деп мәлімдеді компания өкілдері.

Компания өкілдері істің барлық мән-жайы объективті әрі жан-жақты зерттелуіне мүдделі екенін атап өтті.

Бұған дейін БАҚ-та Ақылбек Базенов жеке күзет компаниясына «Қазтеміртранс» нысандарына қызмет көрсетуге рұқсат беру үшін 540 млн теңге көлемінде пара алып жатқан жерінде ұсталғаны туралы ақпарат тараған.