500 жаңа жұмыс орны және жылына 464 миллион өнім: Түркістан облысында жаңа зауыттың құрылысы басталды

Түркістан облысының фармацевтика саласы сапалы жаңа кезеңге аяқ басты. Сауран ауданындағы «Turan» арнайы экономикалық аймағына қарасты «Ораңғай» аумағында отандық нарықты сауықтыруға бағытталған «Orzax Central Asia» ЖШС-нің биологиялық белсенді қоспалар шығаратын заманауи зауытының іргетасы қаланып, уақыт капсуласы қойылды, де хабарлайды Түркістан облысы әкімінің баспасөз қызметі.

Бұл ауқымды бастама Мемлекет басшысы Қасым-Жомарт Тоқаевтың Түркия Республикасына жасаған ресми сапары аясында қол жеткізілген жоғары деңгейдегі уағдаластықтардың заңды жалғасы болып табылады. Инвестор – әлемнің 50-ден астам еліне 150-ден астам өнім түрін экспорттайтын түркиялық фармацевтика гиганты «Orzaks Pharmaceuticals and Chemical Industry Inc» корпорациясы.

Іс-шарада сөз алған Түркістан облысының әкімі Нұралхан Көшеров бұл жобаның стратегиялық салмағына ерекше тоқталды.

 Өңір басшысының айтуынша, қазіргі таңда облыстағы фармацевтикалық тауарлар нарығының 100 миллиард теңгеге жуығы шетелдік импортқа бағынышты. Осы орайда, ел экономикасын шикізаттық бағыттан әртараптандыру мен импортты алмастыру – ұлттық қауіпсіздік пен халық денсаулығының берік кепілі. Бұған дейін аймақта мақта-тоқыма, ет, жүгері және жиһаз кластерлері дамып, 176 млрд теңгенің 31 жобасы іске қосылса, биыл 280 млрд теңгеге 39 жоба жүзеге асырылуда.

Өз кезегінде «Orzax Central Asia» ЖШС құрылтайшысы Алимоглу Селман мырза көрсетілген зор қолдау үшін Қазақстан Үкіметі мен аймақ басшылығына ризашылығын білдірді. Түркістанның тарихи орнын атап өткен инвестор зауыт құрылысы белгіленген кестеге сай жүргізіліп, өңірдің экспорттық әлеуетін айтарлықтай арттыратынына уәде берді.

Отандық фармацевтиканы жаңа биікке көтеретін бұл өндіріс орны елдегі фармацевтикалық тәуелсіздікті қалыптастырудағы елеулі белес болмақ.