440 техникаға енгізілген жаңа жүйе: «Астана Тазалық» KazTraffic-2025 көрмесінде инновация жаңалықтарын көрсетті

Астанада 19–21 қараша аралығында өтіп жатқан XXI халықаралық «KazTraffic-2025» көрмесінде «Астана Тазалық» ЖШС қалалық санитарлық қызметтің жаңа цифрлық шешімдерін ұсынды. Іс-шара Қазақстан Республикасы Көлік министрлігінің қолдауымен ұйымдастырылып, оған әлемнің сегізден астам елінен 300-ден астам компания қатысуда.

Кәсіпорын таныстырған экожүйе GPS-бақылау, жанармай шығынын өлшеу, электрондық жол парақтары, маршруттарды талдау құралдарын бір платформаға біріктіреді. Цифрлық жүйе қазір елорданың 440 арнайы техникасында іске қосылған. Бұл есептілікті толық автоматтандыруға, ЖЖМ шығынын бақылауға және тиімді маршруттық жоспарлауға мүмкіндік беріп отыр.

Сонымен бірге техниканың техникалық жағдайын онлайн қадағалау, қызметкерлердің күнделікті медициналық тексерістен өтуін бақылау және құжат айналымын оңтайландыру тетіктері таныстырылды. Қауіпсіздік деңгейін көтеру үшін «Med365» және «Адал Чек» онлайн-медтексеру жүйелері қолданылатыны айтылды.

Көрме аясында алғаш рет балалар мен жасөспірімдерге арналған экологиялық Tazalike интерактив ойыны көрсетілді. Жоба жас буынға қоқысты дұрыс сұрыптау мәдениетін үйретіп, қаланың санитарлық жүйесінің жұмысын түсіндіруге бағытталған.

«KazTraffic-2025» көрмесі «Астана Тазалық» кәсіпорнының инновациялық технологияларды енгізу, экологиялық мәдениетті дамыту және астананың санитарлық стандарттарын жаңа деңгейге көтеру бағытындағы жүйелі жұмысының бір көрінісіне айналды.