44 ел Қазақстанда сотталған өз азаматтарын қабылдаудан бас тартқан

Соңғы екі жылда Қазақстан Бас прокуратурасына жазасын өтеушілерден азаматтығы бар еліне қайтару туралы 302 өтініш түскен. Оның ішінде 229-ы қанағаттандырылып, 73-іне жәбірленушілерге төленбеген өтемақыларға байланысты бас тартылған. Бұл туралы премьер-министр Олжас Бектенов мәлімдеді.

«44 жағдайда азаматтығы бар мемлекеттер өздерінің сотталған азаматтарын қабылдаудан бас тартты. Жазасын өтеушілерді өз еліне беру тек олардың ерікті келісімімен жүзеге асырылады», – деді Бектенов Мәжіліс депутаттарының шетел азаматтарын өз еліне қайтару туралы сұрағына жауап бере отырып.

Премьер-министрдің дерегінше, Қылмыстық-атқару жүйесі мекемелерінде қазір 22 елден келген 1 085 шетелдік азамат жазасын өтеп жатыр. Қазақстан бұл мемлекеттермен сотталғандарды беру жөнінде келісім жасасқан.

Атап айтқанда, бұл елдер қатарында: Ресей, Түрікменстан, Тәжікстан, Қырғызстан, Өзбекстан, Әзербайжан, Армения, Украина, Беларусь, Молдова, Грузия, Ауғанстан, Моңғолия, Пәкістан, Түркия, Қытай, Иран, Грекия, Германия, Бангладеш, Ұлыбритания және Филиппин бар.