"400 теңге болуы қажет": Алматыда автобус компаниясының басшылары жолақысын көтеруді сұрайды

Алматылық автобус компанияларының басшылары қазіргі тариф тиімсіз болғандықтан, жолақысын өсіруді сұрайды, деп хабарлайды Bizmedia.kz.

«Eco Bus Service» ЖШС басшысы Мадия Кирюхинаның айтуынша, қала тұрғындары мен әкімдік тым жоғары талаптар қояды. Ол өздерінің тек экологиялық жанармай пайдаланатынын айтып, өткен жылы алынған 250 автобус тағы 150 көлікпен толықтырылғанын атап өтті. Жоғары деңгейдегі талаптардың қаржысы да соған сәйкес болуы қажет дейді.

Ал City Bus автобус алаңының иесі Абылай Өстемір 12 метрлік көліктердің өткен жылы 70 млн тұрғанын жеткізді. Ал осы жылы экологиялық бағытқа бет бұруға байланысты эко-жанармай пайдаланатын автобустарды алатындарын және олардың әрбірі 170 млн. теңге тұратынын айтты.

"Әкімдіктің бөлетін ақшасы барлық шығынды жаба алмайды, себебі негізгі жолақы 400 теңге болуы керек және бізге автобус тарифын қайта қарастыру керек", – дейді басшы. 

Бүгінде Алматыда жолақы – 100 теңге, ал егер қолма-қол төлесеңіз – 200 теңге. Өткен жылы қала әкімдігі автобус тасымалдаушыларына 68,7 млрд теңге бөлген. Осы жылы бұл соманы 97 млрд теңгеге өсіруді жоспарлап отыр.

Әмір Жәнібек