4 млрд теңгеге жуық қаржы жымқырған: Түркістан облысында білім бөлімі басшысы мен бухгалтерлер сотталды

Түркістан облысының Шардара аудандық білім бөлімінің басшысы мен бухгалтерлеріне қатысты үкім шықты. Олар 4 млрд теңгеге жуық мемлекет қаржысын жымқырғаны үшін жауапқа тартылды, деп хабарлады «31 арна».

Сот алдында барлығы 15 адам жауап берді. Тергеу дерегіне сәйкес, ұйымдасқан топ мүшелері іс жүзінде жұмыс істемейтін адамдарға жалған жалақы рәсімдеген. Кейін бұл қаражат айыпталушылардың жеке шоттарына аударылып, жылжымайтын мүлік пен басқа да қажеттіліктерге жұмсалған.

Сот Дәурен Мадалиевтің айтуынша, қылмыстық жолмен алынған барлық мүлік мемлекет кірісіне тәркіленді. Оның ішінде үйлер, пәтерлер, 20-ға жуық жылжымайтын және жылжымалы нысан бар. Сонымен қатар сотталғандардың біріне тиесілі алтын сауда нүктесі де заңсыз табыс көзі ретінде мемлекет меншігіне өткізілді.

Нәтижесінде басты фигурант 10 жылға бас бостандығынан айырылды. Қалғандары жеті жылға сотталды. Ал 62 жастан асқан үш сотталушыға бас бостандығын шектеу жазасы тағайындалды. Тағы екі айыпталушының жазасы кәмелетке толмаған балаларының болуына байланысты бес жылға кейінге шегерілді.