4,5 трлн теңге қайда кетті? Мәжіліс депутаты Үкіметтен жауап талап етті

Мәжіліс депутаты Әбутәліп Мүтәлі Премьер-Министрдің орынбасары – Ұлттық экономика министрі Серік Жұманғаринге бизнесті мемлекеттік қолдау тетіктерінің тиімділігіне қатысты депутаттық сауал жолдады.

Депутат сауалында Жоғары аудиторлық палата жүргізген аудит нәтижелері алаңдатарлық жүйелі мәселелерді көрсеткенін атап өтті. Оның мәліметінше, 2019–2024 жылдар аралығында кәсіпкерлікті қолдауға шамамен 4,5 трлн теңге бөлінгенімен, бұл шаралардың елеулі бөлігі нақты экономикалық нәтиже бермей отыр. Аудит қорытындысына сәйкес, кәсіпкерлердің 80 пайыздан астамы мемлекеттік қолдаудың өз бизнесіне айтарлықтай әсерін сезінбеген, ал 66 пайызы қаржылық емес қолдау шаралары туралы мүлде хабарсыз болған. Сонымен қатар экономикадағы орта бизнестің үлесі әлі де 6–7 пайыз деңгейінде қалып отыр.

Әбутәліп Мүтәлі Ұлттық экономика министрлігі мен «Атамекен» ұлттық кәсіпкерлер палатасы арасындағы өзара іс-қимылдың тиімсіздігін де сынға алды. Оның айтуынша, үйлестірудің әлсіздігі салдарынан миллиардтаған бюджет қаражаты нақты нәтижесіз, формалды бағдарламаларға жұмсалып, есеп үшін ғана игеріліп келеді.

Депутат 2024 жылға арналған «Іскер аймақ» бағдарламасын мысалға келтірді. Бұл бағдарламаға 93,5 млрд теңге бөлінгенімен, қаржының 60 пайыздан астамы небәрі бес ірі қалаға бағытталған. Нәтижесінде шағын қалалар мен шалғай аудандар іс жүзінде қолдаусыз қалған.

Сауалында ол қалыптасқан жағдайды жүйелік теңсіздік деп бағалап, мемлекеттік қолдау негізінен ірі қалаларға шоғырланып отырғанын, ал өңірлердегі кәсіпкерлер үшін оның қолжетімділігі мен тиімділігі төмен екенін айтты.

Осыған байланысты Әбутәліп Мүтәлі Ұлттық экономика министрлігі мен «Атамекен» не себепті нақты нәтиже бермейтін бағдарламаларға қомақты қаржы жұмсап отырғанын, бұл үшін кім жауап беретінін және мемлекеттік қолдауды елдің барлық өңіріндегі кәсіпкерлерге шын мәнінде жеткізу үшін қандай нақты шаралар қабылданатынын сұрады.