4,5 млрд теңге залал: OrdaMed басшысына іздеу жарияланды

«OrdaMed» АҚ басқарма төрағасы Еркін Ділімбетов ресми түрде іздеуге жарияланды. Бұл туралы мәлімет Қазақстан Республикасының Бас прокуратурасының құқықтық статистика және арнайы есепке алу порталында орналастырылған.

Іздеу ісі 28 қаңтарда Астана қаласында тіркелген. Іздеуді бастауға Қазақстан Республикасының Ұлттық қауіпсіздік комитеті бастамашы болған. Қазіргі таңда Еркін Ділімбетовті ҰҚК-нің Сыбайлас жемқорлыққа қарсы қызметі іздестіріп жатыр.

Бұған дейін ҰҚК «OrdaMed» компаниясы басшылығына қатысты тергеу жүргізіліп жатқанын хабарлаған. Арнайы қызметтің нұсқасына сәйкес, компания Қазақстан аумағында өз өндірісі бар екені жөнінде жалған құжаттарды пайдаланып, мемлекеттік медициналық мекемелерге 28 түрлі медициналық жабдықты жеңілдетілген шартпен жеткізу кезінде заңсыз преференциялар алған. Ал іс жүзінде дайын өнім шетелден әкелінгені айтылды. Мемлекетке келтірілген залал көлемі 4,5 млрд теңгеге бағаланған.

Аталған іс аясында сот санкциясымен компанияның техникалық директоры, бұрынғы басқарма төрағасы және өндірістік басқарма басшысы қамауға алынған.

Ал OrdaMed компаниясы ҰҚК тағылған айыптауларын жоққа шығарды. Компания өкілдерінің мәлімдеуінше, жеткізілген барлық медициналық жабдық нақты зауытта өндірілген, пайдалануға берілген және еліміздің әр өңірінде медицина қызметкерлері қолданып отыр. Еркін Ділімбетов бұл мәселе өнімнің жалғандығына емес, өткен жылдардағы локализация мен құжаттарды рәсімдеуге қатысты құқықтық түсіндірулерге байланысты екенін айтқан.

Компания өз қызметін штаттық режимде жалғастырып жатқанын және іскерлік беделін қорғау мақсатында өз ұстанымын құқықтық алаңда білдіретінін мәлімдеді.