310 адам тыйым салынған заттарды алып өтпек болған: алматылық полицейлер қауіпті заттарды тәркіледі

Алматы қалалық Полиция департаменті метрополитен аймағында қоғамдық тәртіп пен азаматтардың қауіпсіздігін қамтамасыз ету мақсатында досмотрлық шараларды күшейтті. Күн сайын 110 мыңнан 130 мыңға дейін жолаушы тасымалдайтын стратегиялық нысанда заңдылық пен тәртіпті сақтау басты назарда.

Жыл басынан бері метро полициясы жүргізген тексеру іс-шараларының нәтижесінде тыйым салынған заттарды алып өтуге тырысқан 310 азамат анықталды, деп хабарлайды 24 Kz. Тексеру барысында заңсыз айналымнан 29 пышақ, конструктивті түрде кастетке ұқсас 62 бұйым және 4 жауынгерлік оқ-дәрі тәркіленді. Тәртіп бұзған тұлғаларға қатысты тиісті процестік шаралар қабылданды.

Бүгінгі таңда метро бекеттерінде 604 цифрлық бейнебақылау камерасы жұмыс істейді. Олардың бір бөлігі нақты уақыт режимінде бет-әлпетті тану функциясы бар заманауи смарт-жүйеге қосылған.

Метрополитендегі Полиция басқармасының бастығы полиция полковнигі Орал Ахимов азаматтарды метроны пайдалану ережелерін қатаң сақтауға, қырағы болуға және кез келген күдікті заттар немесе құқық бұзушылықтар туралы полиция қызметкерлеріне дереу хабарлауға шақырады.