24 наурыздан бастап телефоныңыз бұғатталуы мүмкін: қалай алдын алуға болады?

24 наурыздан бастап Қазақстанда ұялы құрылғыларды тіркеудің жаңа жүйесі енгізіледі, деп хабарлады Цифрлық даму, инновациялар және аэроғарыш өнеркәсібі министрлігі. Бұл өзгерістер телефондардың заңды айналымын қамтамасыз етуге бағытталған.

Жаңа ережелер тек 24.03.2025 жылдан кейін елге әкелінген жаңа құрылғыларға ғана қатысты. Қазақстан аумағында бұрыннан бар және Идентификациялық кодтар дерекқорына (ИКД) енгізілген телефондар ешқандай шектеусіз жұмысын жалғастырады.

Бүгінгі таңда Қазақстанда шамамен 3,7 миллион қайталанған IMEI-коды бар құрылғылар тіркелген. Олардың заңсыз әкелінуі айтарлықтай экономикалық және әлеуметтік мәселе туындатады. Бұндай мобильді құрылғылар нарығы құрылғылардың заңды айналымын бақылауды қиындатып, телефон ұрлығының көбеюіне ықпал етеді және әділетсіз бәсекелестік туғызады.

Жүйе қалай жұмыс істейді?

"Ақ" тізім: 24 наурызға дейін Қазақстанда қолданылып жүрген барлық телефон автоматты түрде осы тізімге енгізіледі.
"Сұр" тізім: уақытша рұқсат етілген құрылғылар. Олардың иелері 30 күн ішінде құрылғының заңды түрде әкелінгенін растауы тиіс.
"Қара" тізім: заңсыз әкелінген, жалған немесе ұрланған құрылғылар. Олар бұғатталады.

Телефонды қалай тексеруге болады?

24 наурыздан бастап IMEI-кодты алдын ала тексеру қызметі іске қосылады. Тұтынушылар телефон сатып алмас бұрын IMEI-кодты imei.rfs.gov.kz сайтынан тексере алады.

Министрлік бұл өзгерістер қарапайым пайдаланушыларға қиындық туғызбайтынын, керісінше, заңды айналымды реттеуге көмектесетінін атап өтті.